A Deputación de Pontevedra reclama que a explotación das augas termais sexa pública

A Deputación de Pontevedra reclamou que a explotación das augas termais pase a mans públicas, como expuxo o deputado pontevedrés Carlos López Font durante a súa intervención na reunión da Asociación de Vilas Termais da FEMP, que se celebra esta semana en Ariño (Teruel).

O tamén concelleiro en Vigo asegurou que o ente provincial ten "moita preocupación" ante a regulación do aproveitamento das augas termais que prepara a Xunta, como anunciou o presidente autonómico, Alberto Núñez Feijóo.

Así, López Font remarcou que estas augas deben estar en mans "públicas" e que sería "indefendible" que a normativa do Goberno galego "salvagardase intereses privados" sobre un recurso como a auga.

Nesta liña, apuntou que a titularidade pública é unha demanda dos rexedores da provincia e xa é unha realidade en comunidades como Aragón ou Andalucía.