Bombeiros e policías locais de Ourense reclaman de novo este mes o pago completo das súas nóminas

Medio centenar de Policías Locais e Bombeiros de Ourense protestaron na mañá deste xoves na casa consistorial para esixir o pago completo dos seus salarios despois de percibir nos últimos meses "entre un 30 ou un 40%" menos do que teñen estipulado. Os traballadores municipais aseguran que non recibiron os pluses de nocturnidade e festividade nas súas nóminas dos meses de marzo e abril, así como tampouco o incremento do 0,5% pactado e que aínda está pendente de ser abonado.

Ante esta situación, medio centenar de membros de ambos os corpos acudiron este xoves ao salón de plenos do concello ourensán para reclamar que se proceda ao pago das contías que demandan. A acción derivou nun encontro co rexedor municipal, Gonzalo Pérez Jácome, quen, acompañado polo xefe de Recursos Humanos, José Manuel Oliver e tamén o Coordinador Xeral do Concello, Francisco Cacharro; mantiveron unha reunión cos traballadores. Os responsables do goberno local defenderon ante os traballadores que a nómina de abril xa foi tramitada, polo que haberá que esperar ao mes de maio para que se poidan recuperar os pluses.

O problema parte da execución dunha sentenza que anulou o capítulo de persoal dos orzamentos municipais de 2020, aprobados por Democracia Ourensana e o Partido Popular, pero que o sindicato CSIF denunciou por non ser negociado cos representantes sindicais dos traballadores.

Tras a reunión de pouco máis dunha hora de duración, Carlos Lloves, portavoz do corpo de bombeiros, deu lectura a un manifesto coas reivindicacións tanto dos bombeiros como da Policía Local. No comunicado, sinalan que "esta situación se presumía temporal a consecuencia de certos obstáculos organizativos de escasa entidade", pero "está a converterse nunha problemática indefinida de consecuencias difíciles de prever" e, en todo caso, "de gravísima repercusión nas familias dos empregados municipais".

Recriminan ao concello que permita "por segundo mes consecutivo que os seus traballadores soporten unha notable diminución na retribución mensual que legalmente lles corresponde".
Aseveran que a solución parte por dar cumprimento ao acordo de xunta de goberno local de data de 2 setembro 2021, que aprobou por maioría dos membros asistentes a presentación dunha proposta de modificación do complemento específico nun período de catro meses, permitindo a inclusión dos complementos de nocturnidade e festividade dentro de devandito complemento específico.

"Os afectados que soportamos esta grave e inxusta situación instamos ao señor alcalde a dar inmediato cumprimento do acordo de xunta de goberno local, permitindo incluír os complementos de nocturnidade e festividade dentro do complemento específico", insistiu Lloves.

Ademais, solicitaron que se agenden mesas de traballo intensivas e específicas durante a primeira semana do mes de maio para evitar que esta situación chegue a un terceiro mes consecutivo.

Protesta dos bombeiros dos parques comarcais en Ourense | Fonte: FAC-USO GALICIA - Arquivo