O 97% do alumnado que inicia o colexio obtivo praza no centro educativo elixido como primeira opción
As listas definitivas de admitidos e excluídos publicaranse o 15 de maio e os prazos de formalización de matrícula serán do 20 de xuño ao 1 de xullo.
Por Europa Press / Redacción | SANTIAGO DE COMPOSTELA | 25/04/2024 | Actualizada ás 18:48
O 97% dos alumnos que entran o próximo curso no colexio en 4º curso de Infantil --3 anos-- obtivo praza no centro educativo elixido como primeira opción. Así se desprende dos datos provisionais do proceso de admisión tras as novidades introducidas este ano, coa mellora dos cocientes de 25 a 20 alumnos ao amparo do acordo coas organizacións sindicais.
En total, informou a Xunta, recibíronse 14.379 solicitudes de nenos de tres anos para un total de 21.137 prazas ofertadas, co que se ocuparán o 68% e quedan baleiras a día de hoxe o 32%. Tan só un 3% destes alumnos non conseguiu unha praza no centro de primeira elección, o que supón 430 alumnos en toda Galicia, fronte aos 13.949 nenos que si estudarán no primeiro centro escollido polas súas familias.
Con iso, destaca o Goberno galego, a incidencia da diminución dos cocientes nas aulas dos máis pequenos é "mínima". No cómputo xeral, a subida da taxa de alumnos non admitidos no centro de primeira opción é de só 2,2 puntos porcentuais respecto do curso 2023/24.
Nos casos de máis demanda que oferta de postos, as prazas serán asignadas, como sempre, polos centros ou a comisión de escolarización de cada zona, segundo corresponda, en función do baremo aplicable a cada solicitude de admisión e atendendo aos centros de preferencia marcada, tal e como establece a normativa. Nos concellos cun único centro educativo, os nenos obterán praza no mesmo, aínda que a demanda supere a oferta.
En canto ás sete grandes cidades, na que máis nenos se quedaron fóra da primeira opción é A Coruña, co 92,3%, mentres que o 98,5% das solicitudes de Pontevedra entraron no centro de preferencia.
As listas definitivas de admitidos e excluídos publicaranse o 15 de maio e os prazos de formalización de matrícula serán do 20 de xuño ao 1 de xullo para os alumnos de Infantil e Primaria e do 23 de xuño ao 8 de xullo para os de ESO e Bacharelato.
