Haberá que pedir permiso á Xunta para visitar as Illas Cíes

Os visitantes que queiran achegarse ás Illas Cíes deberán contar cunha autorización personalizada que poderán obter a través da central de reservas habilitada pola Xunta antes de comprar os billetes das navieras. Así o comunicou a Consellería de Medio Ambiente e Ordenación do Territorio, que implantará esta semana o novo modelo, que segue o sistema instaurado xa na Praia das Catedrais. Esta medida fora anunciada pola titular do departamento autonómico, Beatriz Mato, hai uns meses no Parlamento.

En concreto, para acceder ás illas será obrigatoria a obtención dunha autorización a través da páxina web, accesible tamén desde dispositivos móbiles. Así, as empresas que se encargan do transporte marítimo só poderán emitir billetes a aqueles pasaxeiros que dispoñan da perceptiva autorización de acceso para ese día concreto.

A Xunta destacou que os visitantes poderán reservar até 25 prazas por solicitude. Para cada persoa será necesario rexistrar nome, apelidos, documento de identificación, sexo e ano de nacemento. As autorizacións enviaranse por correo electrónico ao solicitante ou poderán descargarse desde a propia páxina web da Xunta.

Estes documentos serán de carácter persoal e intransferible, estarán dotadas con códigos de control QR e terán un número de autorización. Despois da súa obtención, o visitante poderá elixir a naviera coa que quere desprazarse ás Cíes. Con todo, ao desembarcar nas illas, deberá presentar no propio porto a súa autorización personalizada emitida pola Xunta, dado que é o "único documento válido" para poder acceder ao arquipélago.

EVITAR QUE SE EXCEDAN AS VENDAS

A Consellería de Medio Ambiente destacou que as melloras introducidas no sistema de acceso ao Parque Nacional das Illas Atlánticas pretenden evitar a posible sobrevenda de billetes por parte das empresas de transporte que viaxan ao arquipélago.

Con este obxectivo, en Semana Santa estrearase este modelo de emisión de autorizacións para acceder ás Cíes moi similar ao que opera na Praia das Catedrais desde 2015.

O departamento que dirixe Beatriz Mato destacou que son sete as navieras que este ano levarán a cabo as travesías ás Cíes de forma regular, todas elas autorizadas pola Dirección Xeral de Mobilidade e pola Dirección Xeral de Patrimonio Natural.

Por razóns de conservación, ordenación do uso público e seguridade limitarase o número de frecuencias de desembarco de navieras, sen reducir o número de visitantes totais, que será de 2.000 en liña regular.