O Consello da Cultura Galega reforzará en 2019 a acción exterior

O Consello da Cultura Galega (CCG) aprobou o programa de actividades para 2019, ano no que a entidade reforzará a acción exterior e a innovación nos formatos das actividades.

O arranque terá lugar o 9 de febreiro, coa inauguración da exposición 'Os adeuses', que documenta os últimos momentos da emigración galega cara a América nun lugar emblemático para os movementos migratorios como é Ellis Island. Este illote é moi coñecido por ser, durante a primeira metade do século XX, a principal entrada dos inmigrantes que chegaban aos Estados Unidos de América.

Acompañando á exposición, explica o CCG, haberá un "variado programa cultural", pensado para situar a cultura galega neste emblemático espazo. Ademais, en relación con estas liñas de acción, o Consello da Cultura Galega traballará na redacción dun Plan Director, no que buscará darlle un impulso destacado á creación dun Museo da Emigración.

Para o desenvolvemento do programa de actividades, así como para o funcionamento da institución, o Consello da Cultura Galega conta para este ano cun orzamento de 2.679.233 euros, 132.008 máis que en 2018. Con esa cantidade, preténdense manter as liñas de traballo habituais e buscarase unha "maior renovación nos formatos e unha maior transversalidade para chegar a novos públicos".

Nas actividades destacan unha xornada sobre "papel cero", a creación dun foro de pensamento mensual con personalidades galegas, unha xornada sobre mulleres e antropoloxía e a continuidade de proxectos xa consolidados como os 'Encontros co patrimonio cultural' e as xornadas de igualdade.

Ademais, neste ano, o CCG organizará os concertos institucionais habituais: o Concerto das Letras Galegas e o de formato didáctico-musical 'No bico un cantar'; e desenvolverá, en colaboración con outras entidades, numerosas accións ao redor da cultura patrimonial, en homenaxe ao legado de Antón Fraguas neste campo.