Feijóo di que o BNG vive na “contradición permanente” por acudir a eventos co rei e ir en coalición con ERC e Bildu
“Non é moi razoable ir nunha coalición para destruír o Estado ao que supostamente representas na UE”, asegura sobre o acordo entre o Bloque e os independentistas cataláns e vascos.
Por Galicia Confidencial | Compostela | 15/11/2018 | Actualizada ás 20:00
O presidente da Xunta, Alberto Núñez Feijóo, foi claro e directo ao referirse á estratexia política do BNG de cara aos comicios europeos. “Viven na contradición permanente”, dixo en alusión a este pacto cos independentistas vascos e cataláns e a súa presenza en eventos nos que está o monarca español, en alusión á entrega dos premios Fernández Latorre, organizado por La Voz de Galicia.
O líder do PP lamentou que o Bloque se xunte nunha coalición que ten coma obxectivo “romper as regras do xogo democrático”. “Este tipo de alianzas son moi perigosas”, dixo. “Noutros países de Europa están sorprendendose cada vez máis por este tipo de feitos”, indicou.
Preguntado na rolda de prensa posterior ao Consello da Xunta por esta alianza entre Bildu, ERC e o BNG, Feijóo suliñou que non é “moi razoable” ir nunha coalición electoral “para destruír o estado ao que supostamente representas na UE”. “É fundamental reflexionar sobre esta situacións”, concluíu.
