Ourense e Pontevedra están este martes en risco extremo por incendio
O risco é tamén alto ou moi alto no resto de Galicia, salvo en zonas da Costa da Morte e A Mariña.
Por E.P. | SANTIAGO DE COMPOSTELA | 21/08/2018 | Actualizada ás 13:07
Gran parte de Galicia atópase este martes en risco extremo por incendio, nunha xornada na que hai aviso amarelo por calor nas provincias de Ourense e Pontevedra por temperaturas que poden alcanzar os 38 graos. Deste xeito, a práctica totalidade das provincias de Ourense e Pontevedra atópanse en risco extremo, algo que tamén ocorre na zona sur da provincia coruñesa e o sur e centro de Lugo.
Así figura no Índice de risco de incendio forestal (IRDI), que publica diariamente a Consellería de Medio Rural e no que se observa que o risco é tamén alto ou moi alto no resto de Galicia, salvo en zonas da Costa da Morte e A Mariña.
Para o establecemento do IRDI tense en conta a conxunción dos seguintes factores: a situación meteorolóxica, o estado da biomasa vexetal, o das infraestruturas preventivas, das masas arbóreas e o do chan.
