As accións de Inditex caen a mínimos de tres anos, após afundirse a acción un 7,06%

As accións de Inditex caeron a mínimos de fai tres anos após afundirse este venres un 7,06%, até intercambiarse a un prezo de 25 euros, con este recorte, a compañía perdeu nesta xornada 5.921 millóns de euro de capitalización bolsista.

En concreto, os títulos do xigante da distribución, que chegaron a marcar mínimos intradía de 24,75 euros, iniciaron a sesión en terreo positivo, cunha alza do 0,2%, marcando un prezo de 26,97 euros, aínda que xusto antes da media sesión comezaron a virar á baixa.

A caída sufrida por Inditex, que presentará os seus resultados o próximo 14 de marzo, obrigou ao mercado a realizar unha poxa de volatilidade ás 11.52 horas, que concluíu cinco minutos despois, momento no que as súas accións rexistraban caídas superiores ao 6%.

O forte descenso chegaba despois de que JP Morgan rebaixase o prezo obxectivo de Inditex un 6,5%, desde os 38 euros até os 35,5 euros por acción e mantendo a recomendación de 'sobreponderar'. Esta rebaixa sería, segundo o analista de XTB, Javier Urones, unha das razóns do seu desplome.

"Chegou a deixarse un 7% até os 25 euros, niveis que non viamos nesta compañía desde 2015. A guerra pola cota de mercado global entre empresas téxtiles de Asia e Europa, continúa", advertiu.

Ademais, as posicións curtas da firma de moda tamén se situaron en máximos históricos após alcanzar o 0,71% do capital da firma de moda en febreiro, cando hai uns meses non superaban o 0,2% da compañía.