SANTIAGO DE COMPOSTELA | 09/10/2017 | Actualizada ás 19:47 por EUROPA PRESS
A música electrónica e de vangarda volverá a Santiago o vindeiro venres 20 de outubro da man do microfestival 'Cortapega', que organiza a asociación Desconcierto Cultural.
Na súa cuarta edición, que un ano máis se celebrará na sede da Fundación SGAE, o cartel estará conformado por Museless, Playback Maracas, Mira, un lobo! e Nistra. Como colofón, haberá unha 'afterparty' no pub Delorean Social a cargo de Onnlbn.
As entradas están dispoñibles na páxina web www.cortapega.gal e na Reixa Tenda (cale Hórreo, 46), a un prezo de 12 euros. Na billeteira o día do concerto poderanse adquirir por 15 euros.
Desconcerto Cultural aspira a colaborar no asentamento das bases para o fomento de novas expresións musicais dentro da xa consolidada escena galega.
ARTISTAS
Museless experimenta co soul, os sons televisivos do oitenta e mesmo co jazz, explotando todo o potencial do pop electrónico, desde as paisaxes íntimas ao paroxismo.
Playback Maracas son temas enérxicos e cargados de ritmo que contan historias de alieníxenas, da vida na cidade e de longas noites de festa nunha contorna de praia, palmeiras e vida tropical cun directo impresionante.
Mira, un lobo! fan un synth pop escuro e épico, transformando as influencias brindadas por M83, Sigur Rós ou Sufjan Stevens para desenvolver un estilo persoal que estará en formato trío sobre o escenario compostelán.
Nistra caracterízase por construcións progresivas e sutís referencias á música global. Os de Burela (Lugo) revolven todo este caldo de influencias para atrapar coas súas receitas implacablemente bailables.
Pola súa banda, Onnlbn, a última sensación galega encima das mesas de dj, defínese como techno industrial, EBM e IDM, que se combinan nun todo coherente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.