9J.- O BNG levaría un 0,5% do voto nas europeas e hai empate entre PP e PSOE segundo o CIS
O CIS xa incluíu no seu barómetro de abril unha primeira pregunta directa sobre as eleccións ao Parlamento Europeo, e entón o PP aparecía na cabeza cun punto de vantaxe sobre o PSOE
Por Europa Press / Redacción | Santiago | 23/04/2024 | Actualizada ás 16:33
O Centro de Investigacións Sociolóxicas (CIS) outorga un 0,5% en intención directa de voto ao BNG para as eleccións europeas do 9 de xuño, ás que a formación frontista concorrerá en coalición con EH-Bildu e ERC, que o barómetro sitúa cun 0,6% e un 0,8%, respectivamente.
A enquisa sobre Opinións e Actitudes ante a Unión Europea elaborada polo CIS sitúa ao PSOE e ao PP en empate técnico en intención directa de voto para as eleccións europeas do 9 de xuño, cun 19,3% disposto apoiar a candidatura socialista que se presente e un 19,2% á do PP.
O CIS xa incluíu no seu barómetro de abril unha primeira pregunta directa sobre as eleccións ao Parlamento Europeo, e entón o PP aparecía na cabeza cun punto de vantaxe sobre o PSOE: 23,4% fronte a un 22,4%, aínda que un 21,8% de enquisados dixo que non sabía que vai votar nestes comicios, outro 3,2% que evita pronunciarse, un 3% que menciona a outras formacións minoritarias, e un 3,5% que xa pensa en absterse.
Na enquisa sobre 'Opinións e actitudes ante a UE', feita pública este martes e baseada en 3.750 entrevistas telefónicas realizadas do 9 ao 13 de abril, unha semana despois que o barómetro, o CIS volveu a preguntar pola intención de voto ante os comicios do 9 de xuño.
PSOE E PP PERDEN TRES E CATRO PUNTOS NUNHA SEMANA
Trátase doutra pregunta directa para unha resposta espontánea, sen 'cociña' nin cálculo de estimación de voto, e agora o resultado é un empate e son máis os enquisados que aínda non se pronuncian.
Así, se mañá mesmo fosen as eleccións europeas, un 19,3% dos entrevistados xa anuncia a súa intención de votar ao PSOE e un 19,2% ao PP, e todo iso a pesar de que ningún dos dous grandes partidos desvelou a súa cabeza de lista para as europeas do 9 de xuño. Moi lonxe aparecen Vox cun 4,7%, Sumar cun 2,9% e Podemos cun 2,3%, e outras opcións como "o partido de Alvise" e Junts, ambos co 0,9%.
AUMENTAN OS INDECISOS
Pero iso si, nesta segunda enquisa hai un 31,8% de enquisados que aínda non sabe que papeleta collería, un 6% que evita contestar, e outro 4,7% que asegura que non votaría. É dicir, entre unha enquisa e outra, con apenas unha semana de diferenza, o PSOE e o PP deixáron entre tres e catro puntos en voto directo e os indecisos subiron dez puntos.
As eleccións europeas xa están formalmente convocadas, esta semana acaba o prazo para constituír coalicións e non tardarán en coñecerse todos as cabezas de lista, e é previsible que en maio o CIS xa presente unha primeira enquisa preelectoral na que, ademais das preguntas de intención directa de voto, engadirá un cálculo de estimación de voto.
