O capitán do Karar recoñece que sabía que levaban cocaína a bordo

O capitán do MV Karar, Alim Ullah, de Bangladesh, recoñeceu este luns que sabía que o barco levaba un cargamento de cocaína e que, tras partir de Panamá, o buque recolleu a droga fronte ás costas de Colombia, antes de tomar rumbo a Vigo.

Así o manifestou na súa declaración ante a sección quinta da Audiencia Provincial de Pontevedra, con sede en Vigo, onde se retomou o xuízo contra os 28 acusados polo alixo de 3,8 toneladas de cocaína do MV Karar, transportados en abril de 2020, en plena pandemia.

A vista reiniciouse coa declaración do capitán do barco quen, con axuda dun tradutor, explicou que xa sabía que o Karar ía transportar cocaína, e que a droga foi cargada a bordo fronte ás costas de Colombia. Neste proceso, detallou, o encargado de supervisar a carga e contar os fardos era o único español a bordo, o galego José Manuel B.G.

Segundo relatou, a previsión era alixar a cocaína a unhas 350 millas de Vigo, e sinalou que, na ponte de mando, había unha carta náutica cunhas coordenadas anotadas a lapis polo tripulante galego, suposto punto de descarga da droga, aínda que matizou que el non lle viu facendo ditas anotacións.

"ISTO NON É UN ESPECTÁCULO"

Preguntado por unha das defensas acerca de contradicións con respecto á súa declaración en fase de instrución, o capitán proclamou que o único que quere é saír de prisión e deixar atrás este episodio.

Esta resposta suscitou a reacción dos acusados galegos, que soltaron unha gargallada e fixeron espaventos. Ante isto, a presidenta da sala reprobou o seu comportamento e lembrou aos procesados que este xuízo "non é un espectáculo", á vez que lles advertiu de que serían expulsados se non gardaban "a debida compostura".

Acusados o alixo de 3,8 toneladas de cocaína do buque MV Karar, no xuízo ante o tribunal da sección quinta da Audiencia Provincial de Pontevedra, con sede en Vigo.. Adrián Irago - Europa Press | Fonte: Europa Press

OUTROS TRIPULANTES

Nesta xornada tamén prestaron declaración outros cinco tripulantes do barco, e todos eles recoñeceron a súa participación nos feitos, aínda que incidiron en que, cando saíron dos seus países de orixe (Nepal e Bangladesh) para embarcar en Panamá, aínda non sabían que a travesía sería para transportar cocaína.

Con algún matiz, todos coincidiron en sinalar que o galego que ía a bordo non desempeñaba ningún traballo, senón que a súa función consistiu en contar os fardos cando foron cargados mediante un guindastre. A droga foi transvasada a principios de abril desde varias lanchas coas que o Karar se encontrou fronte ás costas de Colombia.

Nesas lanchas, había persoas que "falaban español" co galego que estaba no Karar e unha vez a bordo, os fardos foron gardados pola tripulación nun tanque do barco, sen máis peche que os parafusos e porcas da porta, asegurados con bridas colocadas por José Manuel B.G., segundo apuntou o electricista do barco, tamén de Bangladesh.

REUNIÓN PREVIA Á SAÍDA DE PANAMÁ

Entre os tripulantes que declararon este luns, está un cidadán de Nepal que explicou que, antes de partir, celebrouse unha reunión no MV Karar na que participaron o capitán, o tripulante galego, un cidadán nepalí afincado en Colombia (Jagat Lama) e el mesmo. Nese encontro, explicou, Jagat Lama deu as indicacións para cargar a droga fronte ás costas colombiana, facilitando un nome en clave e unha canle de radio para avisar cando as lanchas coa cocaína estivesen a chegar ao encontro do MV Karar.

Ese mesmo cidadán nepalí, que non está procesado nin se coñecen máis detalles do seu papel nesta operación, comunicábase co MV Karar mediante un teléfono de comunicación vía satélite, falando co capitán, con José Manuel, ou con este tripulante nepalí, segundo explicou na súa declaración. Foi nunha desas comunicacións nas que Lama informou as coordenadas na que se debía producir o alixo da droga, segundo este acusado (o que contradí o manifestado polo capitán).

O xuízo renovarase este martes, coas declaracións dos 8 tripulantes que faltan (todos de Nepal). Dáse a circunstancia de que todos os membros estranxeiros da tripulación sairán de prisión previsiblemente este xoves, xa que se cumpren 4 anos de encarceramento preventivo e a lei non permite prorrogar máis a situación de privación de liberdade. Ademais dos tripulantes de Nepal e Bangladesh, están en prisión provisional un cidadán colombiano, René R.R., e un galego, Ismael C.B. (aínda que este está no cárcere por outro procedemento); mentres que o resto están en liberdade.

A Fiscalía atribúe aos acusados os delitos de tráfico de drogas e pertenza a organización criminal; así como un delito de tenencia ilícita de armas (ao acusado colombiano) e delito de branqueo de capitais (a un funcionario do Servizo de Vixilancia Aduaneira e á súa muller). Para eles pide penas que van desde os 13 anos e medio ata os 19 anos e medio de cárcere, ademais de multas millonarias.