Galaxia publica toda a 'Narrativa reunida' de Luisa Villalta, a homenaxeada no Día das Letras Galegas
Nas próximas semanas chegará tamén ás librerías unha recompilación da súa obra xornalística publicada en A Nosa Terra.
Por Europa Press / Redacción | SANTIAGO DE COMPOSTELA | 19/04/2024 | Actualizada ás 17:08
A editorial Galaxia publica 'Narrativa reunida', exemplar no que recolle toda a narrativa publicada en vida da homenaxeada este 2024 co Día das Letras Galegas, Luisa Villalta. O volume, explican nun comunicado, estará conformado polo libro de relatos 'Silencio, ensaiamos' (1991), conxunto de 11 narracións nas que destacan algunhas das temáticas máis queridas da autora, como a música, o valor da palabra e o paso do tempo.
Tamén incluirá a novela 'Teoría de xogos' (1997), unha obra alegórica na que constrúe a existencia como xogo e onde o cinco protagonistas da historia transitan como "monigotes manexados pola man do azar nunha engrenaxe narrativa profundo e reflexivo".
E finalmente, a novela histórica 'As chaves do tempo' (2001), que recrea unha Galicia mítica gobernada polo rei Arturo baixo o consello do mago Merlín, e na que se presenta o dilema da sucesión do monarca entre os seus herdeiros.
"Estas tres obras resultan centrais na construción da personalidade intelectual e creativa de Luisa Villalta e unha mostra do seu compromiso coa escritura e a sociedade que lle tocou vivir, onde como ela dixo, 'as palabras son enerxía contra o tempo e o único depósito fiable para a esperanza", remarcan no comunicado.
Avanzan que nas próximas semanas tamén chegará ás librarías 'O Libro das colunas', unha recompilación ao coidado de Xosé Enrique Acuña onde se recolle a obra xornalística publicada por Luisa Villalta no semanario A Nosa Terra entre o 4 de xaneiro de 2002 e o 4 marzo de 2004, tan só dous días antes do seu falecemento.
