Máis de cen clubes deportivos recibirán apoio da Deputación da Coruña cunha axuda superior a un millón de euros

A Deputación da Coruña destina 1.012.078 euros a apoiar aos clubs deportivos e deportistas da provincia que participan en competicións de ámbito nacional e internacional, un total de 128 da provincia.

Segundo explican nun comunicado, a resolución provisional deste programa de apoio ao deporte coruñés, publicada este martes no Boletín Oficial da Provincia, beneficia a clubs de todas as especialidades deportivas (fútbol, baloncesto, atletismo, balonmán, rugby, natación, piragüismo, remo, ciclismo, voleibol, hockey, ximnasia, judo e taekwondo) que participan en competicións deportivas do máis alto nivel. Outras sete axudas, apuntan, por importe de 34.098 euros, están condicionadas á achega de documentación complementaria.

Entre as subvencións de maior importe destacan as do Club Viaxes Amarelle de fútbol sala feminino (37.005 euros), que participan na primeira división nacional, Escola Basket Xiria (30.865 euros) e o Club Baloncesto Culleredo (30.865 euros) que participan na liga EBA de baloncesto, a S.D. Compostela (25.339 euros), que participa na 2ª división RFEF masculina ou O Parrulo Fútbol sala (23.190 euros), que participa na 2ª división da liga de fútbol sala.

O deputado de Deportes, Antonio Leira Piñeiro, destacou a "importante contribución deste programa para apoiar aos principais equipos do deporte coruñés e situalos á vangarda do deporte nacional".

RESIDENCIAS ARTÍSTICAS
Francisco Rodríguez Casal, Esperanza Mariño Davila, Laura Martínez Mateo e Carmen Mariña Vidal Valiña desenvolverán os seus proxectos na segunda edición das Residencias Artísticas Mariñán de Literatura e Pensamento. Será no Pazo de Mariñán entre o 15 e o 26 de abril.

Segundo informa a Deputación da Coruña, promotora desta iniciativa, estas foron as persoas seleccionadas polo xurado composto polo poeta Yolanda Castaño, o escritor Iván García Campos e a filóloga e ensaísta María López Sande.

Para a deputada de cultura, Natividade González, as propostas elixidas abordan, entre outras, cuestións "tan esenciais como a nosa identidade, a nosa memoria colectiva, a nosa historia contemporánea e a nosa contorna, desde o orgullo, o compromiso e a reflexión".

Francisco Rodríguez Casal, Esperanza Mariño Davila e Laura Martínez Mateo desenvolverán as residencias na modalidade de literatura, e Carmen Mariña Vidal Valiña a de pensamento. Durante as xornadas recibirán a visita de "dúas figuras consagradas do mundo das letras e do pensamento" como son a escritora Chus Pato e o poeta e escritor Ismael Ramos, apunta a Deputación.