UU.AA. critica o uso "exclusivamente telemático" das comunicacións do rexistro de aves de curral

Unións Agrarias criticou o uso "exclusivamente telemático" das comunicacións por parte da Consellería do Medio Rural relativas ao trámite do 'Rexistro de explotacións avíscolas de autoconsumo'.

Nunha nota de prensa, o sindicato afirma que os propietarios de aves de curral para autoconsumo que optaron pola opción de comunicación 'por correo postal' están a recibir respostas da Consellería "a través dunha caixa de correos dixital en lugar de mediante correo ordinario, tal e como solicitaran".

Explica que é unha situación que se repite en distintas comarcas e que está a crear malestar, "sobre todo entre as persoas maiores que non entenden que despois de toda unha vida producindo os seus ovos e pitos en casa atópanse agora coa obrigatoriedade de legalizar os seus currais baixo ameazas de multa e por medios electrónicos alleos ás súas posibilidades".

Por iso, Unións Agrarias pide á Consellería que inste as oficinas de extensión agraria que non están a utilizar o correo postal para as comunicacións cando así lles foi solicitado procedan a utilizar este sistema.

Nesta liña, o sindicato agrario asegura que fontes de varias oficinas de Extensión Agraria trasladáronlles que utilizan o sistema dixital porque "carecen de infraestrutura" para responder vía correo postal.

Varias galiñas nun curral, a 6 de marzo de 2024, en Bóveda, Lugo, Galicia.. Carlos Castro - Europa Press | Fonte: Europa Press