Os rexistros civís das cidades galegas deberán contar polas tardes e nos sábados con entre dous e tres traballadores

A Xunta emitiu unha resolución pola que regula o persoal co que deberán contar os rexistros civís das sete cidades en horario de tarde e sábados, así como as súas condicións de traballo. Segundo recolle o Diario Oficial de Galicia (DOG) deste xoves, tanto os rexistros da Coruña e Vigo deberán contar con tres funcionarios no servizo da quenda de tarde e sábados pola mañá (unha quenda integrada por oito persoas), mentres que deberán ser dúas de servizo no caso de Ourense, Santiago, Lugo, Pontevedra e Ferrol (unha quenda integrada por catro persoas).

O horario dos rexistros civís das cidades é de 9.00 a 18.00 horas de luns a venres e de 10.00 a 13.00 horas os sábados. Así, a orde recolle diferentes compensacións remuneradas por horas especiais traballadas. O tempo de traballo realizado de 17.00 a 18.00 horas de luns a venres computarase como dúas horas efectivas por cada hora traballada. No caso da xornada que se realiza os sábados de 10.00 a 13.00 horas, cada hora traballada computará como dúas horas e media efectivas de traballo.

A retribución será de 53,80 euros por cada xornada vespertina da venres e de 89,6 euros por cada xornada de sábado. Esta resolución será de aplicación mentres non se aproben as respectivas relacións de postos de traballo do persoal funcionario dos corpos dos rexistros civís das cidades que voluntariamente opten por unha xornada de mañá e tarde incentivada economicamente.

En caso de non reunirse o número mínimo de integrantes das quendas entre o persoal que preste o seu servizo no órgano que teña adscrito o rexistro civil ou de deixar de existir este por renuncia ou cesamento no centro de destino do persoal integrante, poderá ofertarse a posibilidade de integrarse nas devanditos quendas ao persoal funcionario que o solicitou.

Letreiro indicativo dun rexistro civil | Fonte: Marta Fernández Xara - Arquivo