Por E.P. | PONTEVEDRA | 07/05/2024 | Actualizada ás 20:24
A mortalidade nas estradas da provincia de Pontevedra repunta no que vai de ano, cun 66% de vítimas vulnerables, segundo datos expostos polo subdelegado do Goberno, Abel Losada.
Fíxoo con motivo da entrega de elementos reflectores de alta visibilidade a colectivos viarios vulnerables, xunto a axentes do Subsector de Tráfico e a xefa provincial de Tráfico, Paula Yubero.
A iniciativa enmárcase na campaña de sensibilización sobre usuarios vulnerables nas estradas convencionais de Galicia que está a desenvolver a Dirección Xeral de Tráfico (DGT) ata o vindeiro domingo, día 12.
O subdelegado alertou da alta mortaldade que están a rexistrar as estradas da provincia, "cun comezo de ano moi negativo, xa que levamos hoxe un total de 12 vítimas mortais, a metade das vítimas mortais que houbo en todo o ano anterior".
Ademais, o 66% das persoas falecidas, é dicir, oito das 12, eran usuarios vulnerables: catro motoristas, dous usuarios de ciclomotor e dous peóns.
FUNDACIÓN CONTRA O NARCOTRÁFICO
Por outra banda, o subdelegado do Goberno recibiu á Fundación Galega contra o Narcotráfico e estudou cos seus responsables o documento que elaboraron con 20 propostas concretas para mellorar a loita contra o tráfico de drogas. Á reunión asistiron Manuel Couceiro e Fernando Alonso, presidente e xerente da Fundación.
O subdelegado aplaudiu a realización deste documento, froito dun traballo multidisciplinar con especialistas no ámbito social, policial e xudicial, con propostas, fundamentalmente, no ámbito lexislativo para a loita contra o narcotráfico. Así se recollen accións relativas ás penas e o seu cumprimento, ás fianzas e aos embargos, entre outras cuestións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.