A Xunta defende o contrato do transporte escolar a pesar da sentenza do TSXG: "non hai compadreo coas empresas"
Cre "razoable" que haxa incidencias no ámbito escolar, como denuncia o PSdeG, pero rexeita "lanzar unha sombra de dúbidas"
Por Europa Press / Redacción | Santiago de Compostela | 08/11/2023 | Actualizada ás 13:57
A conselleira de Infraestruturas, Ethel Vázquez, tachou de "inaceptable" as acusacións do deputado do BNG Paulo Ríos en relación cun suposto "compadreo" con empresas no transporte público por estrada.
Pola súa banda, o titular de Educación, Román Rodríguez, contestou á socialista Noelia Otero que é "razoable" que nun servizo coa "dimensión" do transporte escolar haxa incidencias, pero rexeitou "lanzar unha sombra de dúbidas". Ambos os temas tratáronse este mércores no pleno do Parlamento de Galicia, en senllas interpelacións ao Goberno autonómico.
En primeiro lugar, o nacionalista Paulo Ríos recriminou á titular de Infraestruturas a sentenza do Tribunal Superior de Xustiza de Galicia (TSXG) que apunta á repartición de mercado entre Monbus e Alsa e agregou que tamén agora o Consello de Contas, nun informe, "dio claro". "Están a ir en contra das pemes", aseverou.
Na súa quenda, Ethel Vázquez respondeu que "o incremento en número de viaxeiros é espectacular estes últimos meses" no transporte público, no que apuntou a recente adopción dunha "medida social pioneira" para a gratuidade do servizo en maiores de 65 anos.
TRANSPORTE ESCOLAR
A continuación, noutra interpelación, a socialista Noelia Otero denunciou incidencias no transporte escolar por "malas condicións" dos vehículos e viaxes "sen coidadores", entre outras cuestións. O conselleiro do ramo, Román Rodríguez, contestou que "Galicia conta co servizo máis amplo de transporte escolar do estado" e iso "implica unha gran complexidade", pero "todo o alumnado ten garantido o desprazamento".
O que non viu "nin lóxico, nin responsable, nin xusto" é "xerar unha visión tentando desprestixiar ou xerando unha serie de sombras" sobre o transporte escolar. As incidencias "son puntuais" e "os datos póñeno de evidencia", con 181 ao comezo do curso, "a inmensa maioría diarias", isto é, nas que "ao día seguinte" xa hai solución. Afectaron, de acordo coas súas cifras, a 49 centros educativos.
