Arzúa será a capital do queixo esta fin de semana

O Concello de Arzúa presume de ter unha das celebracións dedicadas ao queixo máis importantes do país tanto pola variedade e cantidade de queixerías presentes, nesta edición son 70 as inscritas, como na oferta de actividades paralelas e na calidade dos concertos que terán lugar na fin de semana.

Os postos dispoñibles no recinto feiral esgotáronse un ano máis con queixerías novas de todas as partes do Estado, varias con premios World Cheese Awards e 6 postos de queixerías PLT -Produtores Lácteos Tradicionais-  todas elas co correspondente rexistro sanitario. Como complemento a esta extensa oferta de queixos tamén se atoparán outros locais de alimentación especializada de Galicia e de fóra con produtos gourmet.

O recinto feiral “Terra do Queixo” abrirá as súas portas o sábado ás 11:00 h. e pechará ás 20:30. O domingo o horario será de 10:00 a 18:30 h. E como a concentración de larpeiros/as será grande, que mellor pregoeiro que Benigno Campos, un dos protagonistas do coñecido programa ‘Larpeiros’ da TVG, para falar das bondades do queixo e da súa festa despois da inauguración oficial, cara as 12:00 h. no Campo da Feira.

Na semana previa xa houbo interesantes actividades paralelas relacionadas co aspecto máis gastronómico como masterclass, tertulias técnicas e catas degustación tendo este venres especial protagonismo o XIII concurso de tapas e petiscos ‘Festa do Queixo’ polos establecementos de hostalería de Arzúa.

Na fin de semana destacan, por exemplo, o photocoll “Queixeamos?”, Food Trucks no Campo da Feira, a exposición ‘Concurso de carteis da 44ª edición’, obradoiros relacionados co queixo ou o espectacular ‘Mapa de Galicia feito con queixo’ un dos maiores atractivos para fotografiar desta edición.

Trátase dun espectacular queixo que representa o mapa en relevo de Galicia de 1,5 por 1,5 metros e cun espesor de 25 centímetros. Nel aprézanse claramente as catro provincias galegas cos seus monumentos máis representativos en 3D e os dous camiños de Santiago que pasan por Arzúa, o Camiño Francés e o do Norte. A peza foi elaborada na Queixería Barral e promoveu a iniciativa o club local de fútbol.

Como cada ano, non faltarán as propostas infantís co ‘III Festival Pequequeixo’ o sábado ás 18:00 h. na Praza de Galiza con Ce Orquestra e a animación de rúa de Sanama Bloko Samba Galego e o domingo ás 11:30 h. con Baobab Teatro na mesma localización.

Para todos os públicos música tradicional o sábado de 11:00 a 13.00 h. no recinto feiral a cargo de O Bringuelo e  ambientación musical de rúa o domingo co grupo de gaitas Castro Curbín entre as 11 e as 13:00 h e de 12 a 14:00 h. no recinto feiral, rúas e Praza de Galiza con Festicultores Troupe.

Para os amantes da música e os concertos, o Festival do Queixo deste ano ten un cartel tamén espectacular. Para o sábado noite, a partir das 21.30 h. están programados Inerttes, gañadores do 11º concurso Queixo Maquetón, e a continuación Los Secretos, Heredeiros da Crus e Rafa Morcego DJ. Xa o domingo, en sesión vermú están Broken Peach, banda de soul&rock de Vigo, e pola tarde, a partir das 18:00 h. os galegos Xabier Díaz con Adufeiras de Salitre e Sés pecharán a Festa do Queixo 2019.