O Hospital Gil Casares, no punto de mira tras derrubarse o teito dun corredor en uso

O Complexo Hospitalario Universitario de Santiago (CHUS) procedeu a realizar un estudo estrutural do Hospital Gil Casares despois de derrubarse este xoves o teito dun corredor de paso en uso, pero non houbo feridos.

Así o informaron fontes da xerencia sanitaria compostelá, tras denunciar CC.OO. o "abandono do Gil Casares" e advertir do derrube do "teito dos corredores de acceso ás unidades de UME-Paliativos e Psiquiatría".

"Por fortuna non houbo danos persoais, pois nese momento non andaba por aí ningún paciente, acompañante ou persoal do centro", explicou nun comunicado Comisións Obreiras, que destaca que "non é un suceso illado, pois hai un mes produciuse outro derrube no mesmo hospital". Nese caso foi no servizo de Radioloxía e, lembrou a central sindical, "obrigou a pechar o mesmo e trasladar a actividade ás dependencias da PAC de Santiago".

Así mesmo, incidiu CC.OO. en que nos últimos anos "xa se derrubaron partes do centro hospitalario como o baño da habitación dun paciente da UME, debido ao abandono e o desinterese da xerencia por este centro" que, puntualiza, "aínda sendo pequeno, pode chegar a ter máis de 80 pacientes ingresados nalgúns períodos do ano".

"O desleixo é tal que, a pesar das denuncias efectuadas pola sección sindical de CC.OO., a planta inferior do hospital,  que dá acceso aos vestiarios do persoal está constantemente inundada polas perdas de auga quente e calefacción", denunciou o sindicato.

ZONA PECHADA

Pola súa banda, fontes da xerencia sanitaria compostelá aseguraron que, despois do derrube deste xoves, a zona afectada permanece "pechada" e traballan operarios para arranxala.As mesmas fontes indicaron que se trata dunha "zona de paso en uso", pero "non de tránsito habitual" e ratificaron que no momento do incidente non había ninguén no lugar.

Con todo, o CHUS procedeu a realizar un "estudo estrutural" do Gil Casares para "ver como está o edificio para actuar preventivamente" en caso de ser necesario. Non entanto, a xerencia subliñou que "o máis urxente" é "arranxar" a zona afectada.