SANTIAGO DE COMPOSTELA | 21/02/2018 | Actualizada ás 13:58 por EUROPA PRESS
Julio Araújo, parella de Sonia Iglesias cando desapareceu en agosto de 2010 e pai do seu fillo, declarará durante a tarde deste mércores como investigado, así como un irmán del de nome David, segundo informaron a Europa Press fontes da investigación.
A medida de tomarlles declaración a ambos en calidade de investigados adóptase despois das case 12 horas de rastrexo desenvolvidas este martes nunha propiedade da familia Araújo en busca do corpo da muller pontevedresa. Polo momento non se produciron detencións.
A última persona que viu con vida a Sonia Iglesias foi precisamente Julio Aráujo, quen para os familiares da desaparecida sempre estivo no punto de mira e chegou a estar imputado, pero o caso arquivouse en abril de 2015.
Unha vez que o Xulgado de Instrución número 3 de Pontevedra, especializado en Violencia sobre a Muller, reabriu a causa sobre a desaparición de Sonia Iglesias, leváronse a cabo novas dilixencias practicadas baixo segredo de sumario.
Entre os novos pasos, este martes durante case 12 horas, especialistas policiais inspeccionaron unha casa e un terreo próximos ao cemiterio de San Mauro, en Pontevedra, propiedade da familia de Julio Araújo. Ambos residiron nesta casa antes do nacemento do seu fillo, que tiña 9 anos de idade no momento da desaparición da súa nai.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.