SANTIAGO DE COMPOSTELA | 28/11/2017 | Actualizada ás 15:38 por EUROPA PRESS
O Xulgado de Instrución número 2 de Ourense decretou prisión provisional comunicada e sen fianza para H.A.A., o home de 58 anos detido o pasado domingo após arroiar supostamente a un motorista cunha furgoneta e non prestarlle auxilio, por considerarlle responsable dun delito de homicidio en grao de tentativa.
Os feitos tiveron lugar ás 15,40 horas do 26 de novembro á altura do número 7 da rúa Basilio Losada, no barrio da Ponte, cando o Fiat Escudo que conducía o detido golpeou por detrás á motocicleta na que circulaba J.V.C., de 57 anos.
Fontes da Policía Local explicaron que a furgoneta pasou por encima do motociclista, que se atopa "en estado moi grave" ingresado no Complexo Hospitalario Universitario Ourensán (CHUO).
Á súa chegada, a Policía Local atopouse o furgón parado uns metros máis adiante do lugar do sinistro e o condutor relatoulles que non se detivo inmediatamente "porque se asustou".
Por iso, abriuse unha investigación policial para determinar como se produciu o suceso e se houbo algunha intención no accidente do domingo.
O Servizo de Emerxencias de Galicia, o 112, confirmou o pasado domingo recibir unha chamada dun particular que relataba os feitos e explicaba que, após o golpe, o condutor non prestou axuda á vítima e continuou a súa marcha.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.