A Xunta destina 181.000€ en propaganda da educación pública tras aumentar os concertos privados
A Consellería de Facenda destinará máis de 400.000 euros para diversas campañas institucionais nos grandes medios de comunicación.
Por Galicia Confidencial | Compostela | 23/08/2017 | Actualizada ás 08:00
Este luns o Diario Oficial de Galicia (DOG) publicaba a orde da Consellería de Educación pola que se aproban os concertos educativos para o período dos próximos seis cursos, desde 2017-2018 ata 2022-2023. Uns concertos que aumentan en 21 unidades con respecto a orde anterior e que sitúan ao Goberno de Feijóo como uns dos principais impulsores da educación privada e concertada dos últimos anos.
De feito, na actualidade, o diñeiro público serve para financiar 3.913 centros concertados –moitos deles vinculados a entidades relixiosas--, que dan servizo educativo a 86.000 estudantes en centros privados de educación infantil, primaria, secundaria, especial e formación profesional. O ensino concertado supón xa ao redor do 25% das prazas de escolarización en Galicia e o orzamento destinado ronda xa o 11% da Consellería de Educación.
Unha decisión que foi xa moi criticada por partidos da oposición e sindicatos que acusaron á Xunta de "blindar" os concertos con centros que separan por sexo.
Diñeiro para propaganda
E, a pesar deste aumento da privatización da educación pública, o Goberno galego destinará máis de 185.000 euros en propaganda para defender a importancia da educación pública. Así, acaba de contratar os servizos dunha axencia de comunicación que investirá ese diñeiro baixo a campaña publicitaria "A cultura e a educación como servizos públicos de referencia". Un contrato que depende da Consellería de Facenda. Tamén esta mesma consellería gastará 225.000 euros noutra campaña para “vender” a importancia do “Fondo Social Europeo-FSE”.
A Consellería de Facenda gastará con estas dúas campañas máis de 406.000 euros en propaganda e publicidade institucional que insertará nos medios de comunicación de sempre, é dicir, os grandes xornais galegos como La Voz de Galicia ou Faro de Vigo, entre outros, e emisoras de Radio como a Cadena Cope, Radio Voz ou a Cadena Ser, entre outras.
