A Coordinadora de Traballadoras de Normalización pídelle respecto pola lingua ao Concello de Ferrol

A Coordinadora de Traballadores/as de Normalización da Lingua (CTNL) lamenta que o Concello de Ferrol redacte unha instrución "contraria ao espírito e á literalidade da ordenanza de normalización lingüística" e da lexislación autonómica de promoción da lingua, ao apostar inicialmente polo español como lingua oficial nos contratos. "En última instancia,se transmita a mensaxe de a lingua galega ser a causante dunha suposta falta de axilidade administrativa", critica.

Nun comunicado, esta entidade manifesta a súa preocupación de que se estea a aludir constantemente a uns labores de “tradución ao galego” que non só entran en contradición con moitos dos artigos da ordenanza de normalización lingüística, senón que "contribúen a perpetuar o papel secundario da lingua galega e constitúen o primeiro paso para lle apor todo tipo de prexuízos, neste caso relacionados co bo funcionamento das administracións que todas e todos desexan".

Desde a CTNL valoran positivamente a rápida reacción do goberno local de rectificar a decisión tomada e que se establezan canles de colaboración entre administracións; "mais a verdade é que, a día de hoxe, esta instrución segue vixente xa que non consta que fose modificada". Por iso, recomenda que en todas aquelas decisións internas que tome unha administración que teñan a ver coa xestión ou tratamento das linguas se teña en conta obviamente a lexislación e normativa vixentes, así como o criterio técnico do persoal, neste caso, do servizo de normalización lingüística, co fin de atopar a solución máis acaída e axustada a dereito para cada momento.