Por Europa Press / Redacción | SANTIAGO DE COMPOSTELA | 10/04/2024 | Actualizada ás 16:44
Un grupo de investigación da USC chegou á conclusión de que a resistencia térmica dalgúns materiais pode ser modulada aplicando unha pequena voltaxe, unha investigación que ten aplicacións en aspectos, por exemplo, como o sobrequencemento dos teléfonos móbiles, que provoca fallos, diminúe o seu rendemento e reduce a súa vida útil.
O estudo levouno a cabo o Grupo de Química da Materia Condensada do Centro Singular de Investigación en Química Biolóxica e Materiais Moleculares (CiQUS) da Universidade de Santiago, e foi recentemente publicado na revista ACS Applied Materials & Interfaces. O traballo, dirixido por Rafael Ramos e Francisco Rivadulla, abre novas posibilidades para o deseño de reguladores térmicos e para o desenvolvemento de tecnoloxías máis eficientes e sustentables.
O deseño de novos materiais funcionais cuxa condutividade térmica poida ser regulable permite abordar desafíos como o da disipación térmica en compoñentes electrónicos. Entre estes dispositivos de interese atópanse os 'memristores' (acrónimo formado a partir do inglés memory resistor), un compoñente con conmutación resistiva: ao aplicar un campo eléctrico, o material pode alternar reversiblemente entre diferentes niveis de resistencia eléctrica.
No novo estudo, os investigadores demostraron que en paralelo á conmutación resistiva eléctrica, na interface metal-óxido do material tamén se produce un efecto de conmutación resistiva térmica, debido á acumulación de ións de osíxeno. Este cambio na resistencia ao fluxo de calor pode modular ao redor dun 20 % a temperatura ambiente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.