Publicada a convocatoria extraordinaria para recoñecer a traxectoria profesional doutros 400 traballadores de xustiza
Deste xeito, ábrese unha nova convocatoria para facilitarlles aos traballadores que non cumprían os requisitos nos primeiros prazos o acceso aos graos I e II. Isto suporalles melloras nas anualidades e nas porcentaxes dos seus complementos retributivos.
Por Europa Press / Redacción | SANTIAGO DE COMPOSTELA | 05/04/2024 | Actualizada ás 14:45
O Diario Oficial de Galicia (DOG) publicou este venres o acordo entre a Xunta e as forzas sindicais representadas na mesa sectorial de xustiza para a implantación do réxime extraordinario de acceso ao recoñecemento da traxectoria profesional do persoal ao servizo da Administración de Xustiza en Galicia. Deste xeito, ábrese unha nova convocatoria para facilitarlles aos traballadores que non cumprían os requisitos nos primeiros prazos o acceso aos graos I e II. Isto suporalles melloras nas anualidades e nas porcentaxes dos seus complementos retributivos.
O obxectivo é ampliar as melloras a uns 400 traballadores públicos dos corpos de médicos forenses, de xestión procesual e administrativa, de tramitación procesual e administrativa e auxilio xudicial. Segundo informa a Xunta, o novo acordo enmárcase no pactado por unanimidade en 2022 na mesa sectorial para o desenvolvemento do sistema transitorio de recoñecemento da traxectoria profesional destes traballadores.
Así, nesta nova convocatoria extraordinaria para acceder aos novos graos de recoñecemento profesional, ademais de estar en situación de servizo activo na Administración de Xustiza en Galicia, para o acceso ao grao I requírese contar cunha antigüidade de cinco anos ao final de marzo deste ano. No acceso ao grao II a antigüidade requirida ascende aos 11 anos, tamén ao final do próximo mes. O prazo de solicitude, que ten que ser telemática, é de 30 días hábiles contados a partir deste luns, día 8. Os novos recoñecementos van supor un investimento de case 500.000 euros entre 2024 e 2025.
