Rego reprocha ao Goberno a "discriminación histórica que sofre Galicia" cos trens: "A día de hoxe non é unha alternativa"
Espera que a modenización dos servizos ferroviarios sexan unha realidade esta lexislatura
Por Europa Press / Redacción | SANTIAGO DE COMPOSTELA | 26/01/2024 | Actualizada ás 19:52
O deputado do BNG no Congreso, Néstor Rego, asegurou que espera que a modenización dos servizos ferroviarios, comezando pola liña A Coruña-Ferrol e a execución do by-pass de Betanzos, sexan unha realidade esta lexislatura, tal e como, destacou, recóllese no acordo de investidura asinado polo Bloque co PSOE e que "permitirá enganchar o Eixo Atlántico e conectalo a partir de 2030 con Lisboa en alta velocidade".
Nun coloquio celebrado este venres no edificio do antigo Hospicio de Ferrol para falar das infraestruturas ferroviarias na comarca, Rego, acompañado polo portavoz municipal do BNG, Iván Rivas, destacou as principais necesidades de Ferrol neste ámbito e que "foron obxecto de atención por parte do BNG no acordo de investidura" e das que esta mesma semana, afirmou, falou co ministro de Transportes, Óscar Puente, na súa comparecencia no Congreso.
Para o deputado nacionalista, estas actuacións son "imprescindibles" para deixar atrás "un tren do século pasado que a día de hoxe non é unha alternativa ao coche, nin en tempos nin en confort".
Así, defendeu o impulso aos servizos de proximidade nas áreas urbanas, outro dos elementos do acordo de investidura. Sobre isto, lembrou ao ministro de Transportes a "discriminación histórica que sofre Galicia" nesta materia. "Non hai nas Estado áreas de máis de medio millón de habitantes sen servizos de tren de proximidade", asegurou.
En relación co antigo Feve, que une Ferrol e Ribadeo, Rego lamentou que sexa "outra conexión esquecida" que podería funcionar como un servizo de proximidade. Con todo, o deputado do Bloque afirmou que este tren "ten potencialidade e futuro se recibe os investimentos necesarios para modernizalo".
SITUACIÓN DO TREN EN GALICIA
Ademais, Rego tamén fixo unha reflexión xeral sobre a situación do tren en Galicia nos últimos meses, "caracterizada por constantes incidencias, cancelacións, atrasos e avarías que afectaron aos servizos en toda Galicia".
Por iso, esixiu ao Ministerio que solucione estes asuntos, porque o tren "ten que ser fiable para ser útil". "A xente ten que saír pola mañá das súas casas sabendo que pode confiar en chegar a tempo aos traballos ou aos estudos", manifestou.
