Rueda cualifica de "agravio" a Galicia o acordo PSOE-ERC e pide unha conferencia de presidentes

O presidente da Xunta, Alfonso Rueda, censurou o "agravio" que, asegurou, supón para Galicia o acordo entre PSOE e ERC para Galicia, que "vai seguir sendo leal, pero non será en ningún caso submisa".

Así o trasladou nunha declaración institucional "en defensa do equilibrio da España autonómica" pronunciada no Pazo de Raxoi este venres, na que comezou sinalando que ao longo das últimas semanas no contexto de negociación da investidura de Pedro Sánchez "abríronse varios debates que afectan ao presente e ao futuro territorial de España" e tamén "ao peto dos galegos".

Por iso, avanzou que Galicia "non vai estar calada nin vai ser convidada de pedra" ante cuestións que "afectan directamente o alicerce do Estado das Autonomías" e sinalou que non se pode falar de "condonar" cando "realmente é mutualizar".

Despois de coñecerse este xoves que o pacto entre PSOE e ERC para a investidura de Pedro Sánchez implica que o Estado condonará ata 15.000 millóns de euros de débeda do Fondo de Liquidez Autonómica (FLA) a Cataluña, Rueda afirmou que esta negociación, "de maneira bilateral", é a "modificación dos principios que guiaron á España autonómica ao longo das últimas décadas".

Acompañado do Executivo galego ao completo, Rueda volveu a insistir en que o texto coñecido este xoves, de cumprirse, "suporía un agravio para Galicia", xa que, segundo apuntou, "na práctica, sería a transformación da España autonómica nun modelo de Estado asimétrico".

15 MESES DO ORZAMENTO DA XUNTA

Segundo manifestou Alfonso Rueda, este pacto "recoñece que o Estado asumirá 16.300 millóns de euros" da débeda de Cataluña, o que equivalería "o orzamento íntegro da Xunta para 15 meses".

"O que se vai a facer é repartir entre todos os españois a débeda acumulada por unha soa comunidade. [...] Vaise a distribuír entre todos a débeda de Cataluña. Será unha carga adicional de máis de 400 euros dunha débeda que non é nosa; 1.200 millóns de euros que tería que asumir Galicia como factura, para unha débeda que nós non xeramos. É o custo de soster os servizos sociais en Galicia durante todo un ano"..

Así mesmo, lamentou que Galicia se vería prexudicada despois de "facer durante estes anos o que se espera dunha administración responsable", como "limitar o nivel de endebedamento, que foi o que menos creceu de toda España e que foi todo o contrario do que fixo o independentismo".

"Galicia vaise a ver especialmente castigada por unha solución inxusta e que supón un pésimo incentivo para os xestores responsables, como foi a Xunta", reiterou.

FINANCIAMIENTO AUTONÓMICO

Ademais, Alfonso Rueda sostivo que os acordos "van máis aló" e deixan "especialmente erosionados os dereitos dos cidadáns recolleitos no marco constitucional e na lei orgánica de financiamiento das Comunidades: a suficiencia, a responsabilidade financeira e a solidariedade entre territorios".

Para o titular do Goberno galego "este tipo de arranxos" urxen a necesidade de "reformar o sistema de financiamiento autonómico" para que "siga respondendo con eficacia e equidade ás necesidades do conxunto dos cidadáns e non ás necesidades dun grupo ou un territorio concreto".

"Debe nacer dun consenso multilateral, e non hai outro lugar para alcanzalo que o Consello de Política Fiscal e Financeira, ao contrario dos pactos bilaterais que estamos a presenciar", aseverou.

En opinión de Rueda, as liñas mestras xa se esbozaron no 'Foro Santiago, Camiño de Consenso', que oito presidentes autonómicos, "de diferentes signos políticos", pero "orientados pola solidariedade territorial" rubricaron en 2021 na capital galega e que cre "ten a súa vixencia renovada agora máis que nunca".

"O que é de todos decídese entre todos. Non se pode decidir a porta pechada entre dous partidos", insistiu o mandatario galego. A esta altura da declaración institucional, Alfonso Rueda esixiu tamén a convocatoria urxente dunha conferencia de presidentes para tratar este asunto.

INFRAESTRUTURAS

En materia de infraestruturas, indicou que non se pode permitir que se acorde o traspaso de infraestruturas ferroviarias mentres en Galicia "acumúlanse os atrasos na entrega dos trens de alta velocidade" ou se observa "como permanece conxelada a conexión ferroviaria con Portugal", así como "segue aparcado o corredor atlántico de mercadorías".

Tamén unha autovía "fundamental" como a A-6 atópase "nun deplorable estado de conservación", ademais de "consumarse a negativa da transferencia da AP-9 a Galicia".

"Previsiblemente, os acordos que onte coñecemos completaranse en próximas datas con outros desequilibrantes e inxustos para Galicia e así ata alcanzar a maioría que necesita Pedro Sánchez", subliñou.

"INXUSTA" PARA GALICIA

Así, o presidente da Xunta insistiu en que, a pesar de que se descoñece polo momento "o montante final desta investidura asimétrica", será "inxusta para Galicia". E esa "desigualdade de trato", continuou, "non se limita só á distribución dos fondos", senón que tamén pretende "condicionar a aplicación do conxunto do ordenamento xurídico".

Neste sentido, lamentou que a "extrema laxitud" coa que "se está interpretando a Constitución, que se tenta amoldar para responder as inquietudes do independentismo catalán", transfórmase en "ortodoxia e inflexible contundencia" para "atacar a lexislación autonómica", en referencia á lei do litoral galega, "recorrida con máxima rapidez e nula vontade negociadora polo Goberno central".

"España non pode ser unha nación asimétrica. Non nos van a convencer de que o prezo da convivencia pasa por sacrificar a igualdade entre españois e que ningunha investidura de ningún candidato e de ningún cargo público vai valer xamais tanto como isto", manifestou.

Antes de concluír a súa intervención, Rueda, en referencia velada ao BNG, cualificou de "ofensivo" que acepte o apoio ao PSOE "con cuestións menores e prometidas reiteradamente".

Para finalizar, reclamou un trato "autenticamente equitativo" e un sistema de financiamiento que garanta "os mesmos estándares de calidade" en todo o territorio nacional". "Galicia vai seguir sendo leal, pero non será en ningún caso sumisa", reivindicou. "A partir de agora, e máis forte que nunca, defenderemos a dignidade de Galicia", concluíu.

O DELEGADO DO GOBERNO FALA DE QUE A CONDONACIÓN EN GALICIA É POSIBLE

Ante estas declaracións, o delegado do Goberno en Galicia, Pedro Blanco, pediu a Alfonso Rueda que deixe "a permanente confrontación" co Executivo central e insistiu en que "a condonación da débeda a Cataluña é extensible a todas as comunidades, tamén a Galicia". Despois de que este venres o presidente da Xunta censurase o "agravio" que, asegurou, supón para Galicia o acordo entre PSOE e ERC, Pedro Blanco defendeu que é "un paso máis para conseguir unha lexislatura estable e de convivencia". "A cidadanía votou diálogo, entendemento, progreso e avance", resaltou.

Neste sentido, quixo lamentar "as desafortunadas" declaracións de Rueda sobre este asunto que, segundo o delegado do Goberno, "son froito do descoñecemento ou, peor aínda, por un interese electoralista". En declaracións difundidas aos medios, Blanco lembrou que, tal e como trasladou o ministro Bolaños, "a condonación da débeda a Cataluña é unha medida extensible ao resto de Comunidades Autónomas, tamén a Galicia".

Por iso, dixo non entender por que o presidente autonómico fai declaracións "alertando á cidadanía ante unha situación de desigualdade que non se vai a dar". "Debería de estar a traballar polas preocupacións reais dos galegos, que son moitas e deixar de lado a permanente confrontación co Goberno de España", resolveu.