Adxudicadas as obras para reducir o risco de inundacións do río Anllóns na rúa Sol, en Carballo
A intervención ten un prazo de execución de oito meses e o obxectivo é unha mellor protección fronte ás crecidas no río Anllóns. Para iso, é necesario a demolición dunha edificación, a remodelación da ponte e a creación dunha canle de augas altas na rúa Sol. Así, os traballos inclúen a derriba de tres treitos de escaleiras, unha obra de fábrica pola marxe dereita do río e a habilitación dunha senda coa extensión de 600 metros cadrados de pavimento.
Por Europa Press / Redacción | A CORUÑA | 21/09/2023 | Actualizada ás 16:47
A Consellería de Infraestruturas e Mobilidade, a través de Augas de Galicia, adxudicou por 1.495.040 euros as obras de execución para a remodelación da ponte e creación dunha canle de augas altas na rúa Sol, no concello coruñés de Carballo. Os traballos, adxudicados á empresa UTE Seranco, S.A.U. & Cycasa Canteras e Construciones, S.A., son parte das actuacións necesarias para reducir o risco de inundación do río Anllóns.
A intervención ten un prazo de execución de oito meses e o obxectivo é unha mellor protección fronte ás crecidas no río Anllóns. Para iso, é necesario a demolición dunha edificación, a remodelación da ponte e a creación dunha canle de augas altas na rúa Sol. Así, os traballos inclúen a derriba de tres treitos de escaleiras, unha obra de fábrica pola marxe dereita do río e a habilitación dunha senda coa extensión de 600 metros cadrados de pavimento.
A intervención tamén acolle a demolición e construción dunha nova ponte, que terá un único oco para mellorar a circulación da auga en caso de crecida. Así mesmo, as obras completaranse coa instalación dunha pantalla lateral de contención e a habilitación de dúas pasarelas de acceso ao paseo fluvial.
