O PSdeG destaca o "ton conciliador" do Rei, que busca "puntos de encontro" na sociedade e na política

O secretario xeral do PSdeG, Gonzalo Caballero, destacou o "ton conciliador" do discurso do Nadal do Rei Felipe VI, que busca "puntos de encontro" na sociedade e na política española e "evita calquera motivo que poida xerar tensión ou exclusión".

En declaracións difundidas aos medios, o líder dos socialistas galegos asegurou "coincidir" nas dúas liñas argumentais fundamentais da mensaxe do monarca.

Así, en primeiro lugar, destacou a "importancia da convivencia política e do respecto das regras da democracia" e, en segundo lugar, a chamada a tentar incorporar de forma activa á xente máis nova no funcionamento político e nos valores nos que se sostén a democracia en España.

Ademais, Gonzalo Caballero tamén puxo en valor as mencións do Rei á loita contra a violencia de xénero, á cuestión do cambio climático.

Con todo, considerou que "podería haber unha ampliación dos temas do discurso a cuestións de igualdade económica e de oportunidades" nuns momentos nos que "hai unha ampla desigualdade evidenciada após a crise".

"Valoración positiva cara a un discurso que tenta pór en valor o que a democracia española ten de positivo para a cidadanía. Entendemos que nesa liña temos que avanzar", sinalou nunha intervención na que tamén considerou que "hai retos que cubrir de cara ao futuro".