E Mahoma foi a montaña

Levábamos tempo reclamando que o aspirante ao palacio da Moncloa, “saíse do armario” das propostas de goberno no que semellaba estar metido, e así o fixo en termos xerais, aínda que de xeito un tanto ambiguo.

Por Rafael Cuiña | Lalín | 03/02/2011

 Aínda que Rajoy poida parecer en ocasións un anacoreta, o certo é que as propostas pormenorizadas estes días nun diario de tirada estatal, revelan o traballo do seu equipo económico, moitos dos cales, -encabezados por Cristobal Montoro-, xa o eran do mellor ministro de economía da democracia, Rodrigo Rato. Pode dar a sensación que algunhas entran na demagoxia tan tópica en períodos electorais, ás que o tempo nega pola imposibilidade de facto de afrontalas. Sacar a España da crise en dous anos, non deixa de ser máis unha declaración de intencións, que unha realidade potencialmente realizable. Todos os indicadores económicos aseguran a imposibilidade da economía española de medrar por riba do 2%, antes do 2013, co que a creación positiva neta de emprego sería imposible. O certo é que é practicamente imposible xestionar as contas do Estado de xeito máis chapuceiro do que o está a facer o actual goberno socialista, mais a actual estrutura económica de España, e os dous anos perdidos nas reformas ás que agora comezan a facer fronte, poñen moi complicado o obxectivo marcado por Rajoy.