Besteiro chama á militancia a "reactivar" o PSdeG e anuncia unha conferencia política no outono
O secretario xeral dos socialistas galegos lanzou varias mensaxes ao BNG e proclamou que o PSdeG "non se suma ao cambio cando vén" senón que fai o "cambio".
Por Europa Press / Redacción | SANTIAGO DE COMPOSTELA | 28/04/2024 | Actualizada ás 12:29
O secretario xeral electo do PSdeG, José Ramón Gómez Besteiro, chamou á militancia a "reactivar" ao partido, que celebrará unha conferencia política no outono para debater sobre o seu proxecto para a Galicia das próximas décadas.
Anunciouno durante a súa intervención na apertura do Congreso Extraordinario que os socialistas celebran en Santiago de Compostela e para o que se acreditaron un total de 421 delegados, segundo os datos ofrecidos no arranque polo secretario de Organización saínte, José Manuel Lage.
Durante un congreso que preside a alcaldesa de Betanzos, María Barral, Besteiro arrincou o seu discurso cunha mensaxe de ánimo ao presidente do Goberno e líder do PSOE, Pedro Sánchez, a quen trasladou que renderse non é unha solución. Tras lembrar tamén o seu propio periplo xudicial, polo que permaneceu 8 anos apartado para que todo queda arquivado, Besteiro considerou que "fronte a esa política non se pode dar nin un paso atrás nin á beira. Hai que dar un paso á fronte", dixo. E despois de trasladar a "inmensa honra" de ocupar a Secretaría Xeral do PSdeG, trasladou: "Estou aquí con toda a humildade, 11 anos despois de facelo por primeira vez".
O dirixente socialista arrincou o seu discurso agradecendo o traballo da dirección saínte, co presidente da Deputación da Coruña, Valentín González Formoso, á fronte. Na súa intervención, sinalou que o PSdeG pasou por "escenarios máis bondadosos" pero chamou a "non caer na nostalxia nin no negativismo" que outros quererían que lles invadise. "Hoxe o PSOE ten unha presenza innegable en Galicia, e somos absolutamente decisivos nos distintos planos da administración", indicou.
O dirixente socialista sostivo que "o PSdeG non é, nin debe de ser, unha entidade que apenas se presenta ás eleccións autonómicas". "Aí temos un reto, si, pero cometeriamos erros se non somos capaces de entender toda a potencia que podemos despregar", afirmou. Besteiro, que se referiu ao poder local da formación, remarcou que os socialistas "nunca celebrarán ser oposición", sexa o resultado que sexa e referiuse ao BNG ao asegurar que empeza a ter a sensación de que son o "único partido en Galicia que non está a gusto coa súa posición".
"Así que quero trasladar unha primeira convicción: O PSdeG seguirá sendo un protagonista imprescindible na política galega, pero aspiramos a máis: a gañar e a gobernar", sostivo.
Para iso, nun congreso con 421 delegados acreditados, apelou aos presentes a "traballar xuntos" e comprometeu "todo o esforzo" da nova executiva da formación. "Fágome responsable deste labor, pero eu só non son nada. Sei que conto coa militancia deste partido, quen sempre está á altura do que se reclama", apuntou.
COMPRENDER A GALICIA
No seu discurso, Besteiro indicou que Galicia necesita "múltiples visións" para avanzar cara ao futuro e que o PSdeG ten a "responsabilidade de comprender" ao país para facer fronte ás "visións limitadas e conformistas da dereita". "Podemos facelo máis e mellor. O primeiro paso para aproveitar toda a potencia propia é non resignarse", dixo para sinalar datos que reflicten que hoxe Galicia crece por baixo do que o fai o conxunto do Estado.
Unha situación da Comunidade que vinculou ao feito de que o Goberno galego teña a "única razón de ser" de atacar ao presidente do Executivo estatal, Pedro Sánchez. Deste xeito, fronte a un goberno galego que "se dedica unicamente a ser tertuliano", considerou necesario elaborar un modelo político "real, verdadeiro e actual". Para iso, emprazou aos asistentes a celebrar no outono unha conferencia política na que a formación "afronte o reto ideolóxico dos próximos 30 anos" para Galicia.
"Porque somos un partido de cambio", asegurou para destacar que o PSdeG "non se suma ao cambio cando vén" senón que fai o "cambio". "Non temos que renegar das nosas ideas para sumarnos a nada. O PSOE ten a responsabilidade de orientar ese cambio", indicou.
Deste xeito, para avanzar cara a "unha sociedade mellor, máis xusta, igualitaria e próspera" pediu o apoio dos socialistas presentes co obxectivo de "abrir unha nova etapa" que lidere o cambio para facer unha Galicia mellor.
"GALICIA NON É UNHA ILLA"
Besteiro tamén lanzou outra mensaxe ao BNG ao asegurar que Galicia "non é unha illa como algúns" queren. "Somos unha terra diferente, si, cun modo de ser que nos encanta e que non cambiamos por nada, pero non necesitamos vivir postos a mal con ninguén para sentirmos máis galegos", apuntou nun discurso no que tamén cargou contra o "abuso inhumano" da forza que Israel está a aplicar en Gaza. "Recoñecer ao Estado palestino é unha decisión histórica que debe ser un primeiro paso para lograr unha solución definitiva a este conflito", indicou.
Por último, reivindicou un Partido Socialista "coherente, contundente e valente" e reivindicouse como "a esquerda de goberno", "capaz de gañar". "Somos o partido dos feitos, non das palabras", subliñou.
