A Xunta censura o atraso na posta en funcionamento da liña ferroviaria entre Ourense e Monforte
Diego Calvo tamén lamenta que se pospoña a chegada dos trens Avlo a Galicia e propón que se baixen as tarifas do AVE en compensación.
Por E.P. | SANTIAGO DE COMPOSTELA | 27/04/2024 | Actualizada ás 15:24
A Xunta censurou o atraso na posta en funcionamento da liña ferroviaria entre Ourense e Monforte, que permanece pechada á circulación de trens desde novembro de 2022. En declaracións aos medios este sábado, o conselleiro de Presidencia, Diego Calvo, lamentou que os atrasos nos traballos desta liña supoñen "un capítulo máis de aparcar Galicia" que chega na semana na que se coñeceu que se pospón a chegada dos trens de baixo custo Avlo á comunidade galega.
Calvo criticou a "falta" de información e de "transparencia" por parte do Goberno, un trato que "non" considera "normal" e polo que pide unha rectificación. Así, propuxo que en compensación polo atraso na posta en funcionamento dos trens de baixo custo en Galicia se reduza o prezo dos billetes nos servizos de alta velocidade con destino en Galicia.
Como explica a Xunta nun comunicado, reclaman que "se equiparen" os prezos do AVE ao que terían os Avlo "polo menos nunhas 2.000 prazas diarias que corresponderían a catro frecuencias" dos servizos de baixo custo. "Queremos que nos dean información ao momento e que a información sexa transparente e deixen de prexudicar e deixar de último sempre a Galicia", aseverou Calvo.
