A pensión media galega crece un 5,15%, ata os 1.072,24 euros
Con todo un pesionista cobra 180 euros menos que a media do Estado.
Por Europa Press / Redacción | Santiago de Compostela | 26/04/2024 | Actualizada ás 10:58
A pensión media do sistema, que comprende as de xubilación, incapacidade permanente, viuvez, orfandade e a favor de familiares, creceu en Galicia un 5,15% en abril, en comparación co mesmo mes de 2023, ata os 1.072,24 euros, segundo datos publicados este venres polo Ministerio de Inclusión, Seguridade Social e Migracións, recollidos por Europa Press.
A pesar deste incremento, as pensións galegas aínda quedan uns 180 euros por baixo da media estatal, onde esta prestación alcanzou os 1.252,32 euros no cuarto mes deste ano, subindo un 4,96%. En concreto, en Galicia hai 775.721 pensionistas, crecendo este número un 0,68% nos últimos 12 meses. Deles, 487.788 cobran unha pensión de xubilación, cunha media de 1.226,43 euros, a pesar de que a media nacional deste tipo de prestación é de 1.439,11 euros.
Ademais, 73.674 galegos cobran uns 1.054,30 euros por unha incapacidade permanente e 184.126 habitantes de Galicia perciben de media 759,21 euros por viuvez. Son 23.269 os galegos que embolsan 496,86 euros por unha pensión de orfandade e 6.864 perciben unha prestación en favor de familiares, que de media supón 654,74 euros. Entre outras cifras, en Galicia hai 204.839 pensionistas que reciben o chamado complemento a mínimos, sendo un 33,4% do total de pensionistas, superior ao da media nacional, que é do 27%.
DATOS ESTATAIS
A nivel estatal, a Seguridade Social destinou neste mes de abril a cifra marca de 12.710,8 millóns de euros ao pago da nómina ordinaria mensual das pensións contributivas, un 6,2% máis que en igual mes de 2023, sempre segundo cifras do Ministerio.
