Reunión en Santiago do protocolo de colaboración en materia de política lingüística
Xunto á xefa da Unidade de Multilingüismo da Comisión Europea, Anna Solé, abordaron a elaboración dunha unidade didáctica para difundir o multilingüismo entre todos os centros españois e a tradución xurada en cadea
Por Europa Press / Redacción | SANTIAGO DE COMPOSTELA | 24/04/2024 | Actualizada ás 17:47
Santiago de Compostela acolleu este mércores a reunión anual da comisión de seguimento do Protocolo de colaboración en materia de política lingüística subscrito polos gobernos de Galicia, Cataluña, Illas Baleares, Comunidade Valenciana, Navarra e o País Vasco para establecer unha estrutura de colaboración entre os departamentos de política lingüística das rexións con lingua propia.
O secretario xeral de Política Lingüística, Valentín García, participou este mércores na reunión, onde se expuxeron os avances nalgúns dos asuntos postos sobre a mesa na última reunión.
Xunto á xefa da Unidade de Multilingüismo da Comisión Europea, Anna Solé, abordaron a elaboración dunha unidade didáctica para difundir o multilingüismo entre todos os centros españois e a tradución xurada en cadea, que permitiría habilitar a tradución dos documentos oficiais nas linguas cooficiais.
Segundo explican nun comunicado, a reunión enmárcase na celebración da Asemblea Xeral e da Conferencia Anual da Network to Promote Linguistic Diversity (NPLD), que reunirá entre o xoves e o venres na Cidade da Cultura máis de medio cento de expertos en materia lingüística de toda Europa, entre eles os membros deste Protocolo.
