Dous anos de prisión a un home de 70 anos por abuso sexual e exhibicionismo ante menores
Outro home foi absolto dun delito de abuso sexual continuado contra a súa filla adoptiva ante as dúbidas sobre a súa versión.
Por Europa Press / Redacción | SANTIAGO DE COMPOSTELA | 16/04/2024 | Actualizada ás 16:40
A sección segunda da Audiencia de Pontevedra condenou a un home de 70 anos, veciño de Vilagarcía de Arousa, a unha pena de dous anos de prisión por abuso sexual a unha menor de idade. O xuízo estaba sinalado para este martes e resolveuse mediante un acordo de conformidade co Ministerio Fiscal.
Ademais da pena de cárcere, o acusado aceptou o pago de multas polos delitos de coaccións, lesións e exhibicionismo ante menores de idade. Tamén se lle impón a prohibición de aproximarse ao tres menores, ao seu domicilio ou aos lugares que frecuente a unha distancia non inferior a 100 metros e a de comunicarse con ela ou por calquera medio e liberdade vixiada.
Inicialmente a Fiscalía solicitaba para o procesado oito anos de prisión polos abusos e agresións sexuais que cometeu en abril de 2021 contra tres menores de idade, nun lugar público.
En concreto, no escrito de acusación, o Ministerio público pedía un ano de prisión por abuso sexual a unha menor de 13 anos e a outros catro por anos polo mesmo delito a unha menor de 16. Ademais, por tres delitos de exhibicionismo pedía outro ano e medio de prisión e tamén solicitaba 19 meses e 15 días de prisión por un delito de lesións. A sentenza é firme e contra ela non cabe recurso.
ABSOLTO
Por outra banda, a sección quinta da Audiencia Provincial de Pontevedra, con sede en Vigo, absolveu a un home acusado dun delito de abuso sexual continuado contra a súa filla adoptiva ante as dúbidas sobre a credibilidade da versión ofrecida pola suposta vítima.
Na súa sentenza, difundida este martes polo Tribunal Superior de Xustiza de Galicia (TSXG) e contra a que cabe recurso de apelación, os maxistrados do tribunal pontevedrés determinan que, ao non existir probas máis aló do testemuño da propia denunciante, as análises periciais aprecian carencias na "solidez" das súas declaracións.
A suposta vítima, nacida en Etiopía, foi adoptada no ano 2011 por unha parella de Vigo. Denunciou ao seu pai adoptivo por sometela a supostos abusos sexuais, con tocamentos e insinuacións, de forma continuada durante anos, aproveitando especialmente os momentos nos que a nai non se atopaba en casa porque residía de luns a venres fóra do domicilio familiar.
