Arde unha furgoneta na Autovía do Barbanza e varios coches en Santiago e Os Tilos

Nas últimas horas, varios vehículos víronse afectados polas chamas tanto en Santiago de Compostela, onde durante a madrugada arderon catro turismos estacionados e na mañá do sábado resultou calcinado outro nos Tilos, como na Autovía do Barbanza, onde o incendio dunha furgoneta causou retencións.

Os bombeiros do parque de Santiago sufocaron sobre as 3.30 horas da madrugada un incendio rexistrado nun turismo estacionado na Rúa Cracovia. Cando concluían co operativo, tiveron coñecemento de que había outros tres coches ardendo nunha zona próxima, no Camiño da Ameixaga. Todos resultaron calcinados.

Xa pola mañá, sobre as 11.30 horas, dábase a voz de alarma por un turismo ardendo na parte alta da urbanización Os Tilos, nas proximidades do cruzamento cara á estrada de Cacheiras. Tamén os Bombeiros de Santiago participaron na extinción das chamas, que calcinaron por completo o vehículo.

Sobre as 13.30 horas a DGT alertaba da necesidade de circular con precaución no quilómetro 30 da AC-11, a Autovía do Barbanza, nas proximidades da Pobra do Caramiñal, onde se declarou un incendio nunha furgoneta, o que ocasionou retencións na zona.