Unha investigación da USC descobre un novo mecanismo en enfermidades que danan a capa protectora dos nervios

Unha investigación do CiMUS da Universidade de Santiago de Compostela (USC) descubriu un novo mecanismo que regula a formación da mielina en nervios periféricos. Este encontro, publicado este venres na revista internacional 'Science Advances' abre as portas a entender mellor como as mutacións en varios xenes conducen á patoloxía na enfermidade de Charcot-Marie-Tooth, un grupo de doenzas hereditarias que poden afectar ás vainas de mielina dos nervios periféricos.

O estudo, realizado polo grupo de investigación de Regulación da Expresión Xénica en Enfermidades do CiMUS que codirigen Ashwin Woodhoo e Marta Varela Rey, foi conducido principalmente polos investigadores Paula Ayuso, Alejandro Sánchez-Rueda e Sergio Velasco.

Nun comunicado, detallaron que a vaina de mielina "é esencial" para a función e a saúde neuronal. Así o puideron comprobar ao observar os defectos nerviosos en modelos xenéticos de ratos e nos máis de cen xenes que conteñen mutacións identificadas na enfermidade de Charcot-Marie-Tooth.

"O traballo abre novas vías para comprender a patoloxía nerviosa humana e, en particular, os trastornos desmielinizantes hereditarios. Hai unha clara manifestación de que as mutacións en varios xenes que codifican compoñentes críticos das vías reguladas por nedilación están asociadas coa patoloxía nerviosa humana", explicou Aswhin Woodhoo.

No estudo demostran que a nedilación "é esencial" para a mielinización das células de Schwann, que desempeñan un "papel fundamental" para a función e saúde neuronal, así como para o desenvolvemento e rexeneración dos nervios.

Inhibir xenética ou farmacolóxicamente a nedilación, continuaron, conduce a unha detención das células de Schwann na etapa de promielina, facendo que "non poidan continuar" co proceso de mielinización.

Edificio do CiMUS, da Universidade de Santiago de Compostela | Fonte: USC.