Ana Miranda insta a mellorar o acceso aos medicamentos en "igualdade de condicións" para todos os enfermos

A eurodeputada do BNG, Ana Miranda, defendeu mellorar o acceso aos medicamentos en "igualdade de condicións" en todos os estados membros, así como que sexan accesibles e impulsar a investigación dos novos medicamentos para enfermidades raras e os distintos tipos de cancro.

Así o fixo durante o debate da eurocámara sobre o denominado 'paquete farmacéutico'. "Non hai enfermos de primeira nin de segunda e a saúde e a vida destas persoas non poden depender de decisións do mercado das empresas farmacéuticas", manifestou Miranda. Así mesmo, a eurodeputada do BNG reuniuse con representantes de Asarga e transmitiulle o apoio da formación nacionalista ás súas demandas de garantir o acceso aos medicamentos e potenciar a investigación.

Na reunión, Miranda explicou que a Comisión Europea presentou a revisión do paquete farmacéutico en abril do pasado ano co obxectivo de garantir un acceso equitativo a medicamentos seguros e eficaces na Unión Europea. "Un aspecto importante é que a nova normativa garanta que o lugar de residencia non determine o acceso a tratamentos médicos", subliñou.

A eurodeputada do BNG Ana Miranda | Fonte: BNG EUROPA