Podemos alerta a Bruxelas dos "riscos para a saúde" da fábrica que Altri proxecta en Palas de Rei

A eurodeputada de Podemos, Idoia Villanueva rexistrou este martes no Parlamento Europeo unha pregunta dirixida á Comisión Europea na que alerta dos "riscos para a saúde" da fábrica que a multinacional portuguesa Altri proxecta en Palas de Rei.

Segundo ela, esta iniciativa violaría a nova directiva de Calidade do Aire e o principio Do No Sifnificant Harm ou DNHS, unha condición de Bruxelas que obriga a considerar os efectos directos e indirectos da actividade durante todo o ciclo de vida dun proxecto industrial.

Tal como dixo Villanueva, Altri prevé que a súa instalación consuma 1,2 millóns de toneladas de eucaliptos ao ano e 46 millóns de litros de auga ao día, dos cales verterá 30 millóns, "depurados pero contaminados", ao río Ulla. "A unha temperatura de entre 27 e 29 graos, algo que inevitablemente afectará á flora e a fauna na zona, eliminando especies autóctonas e endémicas. Ademais, en todo o proceso, Altri contempla a emisión de óxidos sulfurosos e nitrosos que poderían causar choiva aceda nun radio de 10 a 30 quilómetros", asegurou a eurodeputada de Pamplona.

Tratando de apoiar aos colectivos veciñais e ecoloxistas, Villanueva pediu á Comisión que explique como é posible que un macroproxecto industrial "contaminante" como o de Altri pode recibir ata 250 millóns de euros en fondos europeos. "É incomprensible que un proxecto que recoñece emisións que causarían choiva aceda, eleva a temperatura do río Ulla e contamínaa poida recibir fondos europeos, aínda que incumpra as directivas europeas de calidade do aire, da auga, do medioambiente ou da saúde", afirmou. Cabe lembrar que o proxecto de Altri atópase aínda en fase de avaliación ambiental, polo que haberá que esperar o resultado da mesma para coñecer se se poderá levar a cabo.

Imaxe do logo de Altri.. PODEMOS | Fonte: Europa Press