Besteiro alerta: o Consello de Contas avisa de "descontrol" nas contas do SERGAS con fondos europeos sen executar
O secretario xeral do PSdeG insistiu en que o Consello tamén fai unha reflexión sobre a "perda de ingresos que provoca esa política fiscal errática" da Xunta
Por Europa Press / Redacción | Santiago de Compostela | 07/05/2024 | Actualizada ás 19:03
O secretario xeral do PSdeG, José Ramón Gómez Besteiro, trasladou este martes a súa preocupación polo "descontrol" que, segundo indicou, está a detectar o Consello de Contas na contabilidade do Servizo Galego de Saúde (Sergas).
Besteiro pronunciouse deste xeito durante unha visita a Tordoia, da que informou o PSdeG nun comunicado e na que asegurou que os socialistas ven "con moita alarma" o que consideran unha "mala xestión" e unha perda de recursos dentro dun organismo que "ten un volume de contratación enrome e de peso no sector público".
Besteiro criticou que, segundo o informe que o Consello de Contas fixo públicos este luns, os fondos europeos "non se están executando" e, por tanto, "están a perderse capacidades".
Así, puxo como exemplo que, segundo consta nesa documentación, dos máis de 1.200 millóns relacionados cos Next Generation, unicamente abonáronse un 15%. Por outra banda, indicou que grandes cantidades que constan como investimento "son en realidade gastos correntes", o que, segundo indicou, súmase a que "aparecen facturas nos caixóns" e a que os orzamentos "se modifican constantemente".
O secretario xeral sostivo que o Consello tamén fai unha reflexión sobre a "perda de ingresos que provoca esa política fiscal errática" da Xunta, que "non beneficia á maioría dos galegos", porque "produce unha perda de recursos". "Mal exemplo damos cando non somos capaces de recadar o suficiente e pedímoslle ao Estado ou a outras administracións que fagan un esforzo maior do que nós estamos a facer", dixo.
Besteiro sostivo que, á vista dos informes de Contas, "hai moito que aclarar", de modo que a preocupación do PSdeG traducirase en "unha petición de explicacións" ao Goberno galego e na esixencia de que se produza unha xestión adecuada, porque, pola contra, "pérdense recursos públicos, moi necesarios nun campo como é a sanidade, que demanda máis investimento e máis recursos humanos para unha mellor prestación".
INDUSTRIA E EMPREGO DE CALIDADE
O xefe de filas dos socialistas pronunciouse deste xeito durante unha visita ás instalacións de TMC Cancela, na que estivo acompañado polo candidato socialista ao Parlamento Europeo, Nicolás González Casares, e polo portavoz do PSdeG no Concello de Tordoia, Tomás Castro Liñares.
Na visita, Besteiro puxo á compañía como exemplo de que "nunha contorna rural pódese xerar emprego de calidade, emprego técnico" e destacou que o 60% dos equipos que fabrica TMC Candea están destinados á exportación.
"Os socialistas compartimos o obxectivo de incrementar o peso industrial no noso país e imos apoialo desde calquera punto de Galicia", asegurou.
