As vendas do comercio polo miúdo galego soben un 2,8% en febreiro, por baixo da media nacional
No conxunto do Estado as vendas do comercio polo miúdo aumentaron un 4,8%, dous puntos máis que en Galicia.
Por Europa Press / Redacción | Santiago de Compostela | 27/03/2024 | Actualizada ás 11:26
O comercio polo miúdo galego incrementou un 2,8% as súas vendas o pasado febreiro, en comparación co mesmo mes de 2023, segundo datos publicados este mércores polo Instituto Nacional de Estatística (INE), recollidos por Europa Press.
Esta cifra supón dous puntos porcentuais menos que a media nacional, xa que no total de España o comercio polo miúdo aumentou a súa facturación un 4,8% no segundo mes do ano, sumando 15 meses á alza. No que vai de exercicio, en Galicia este tipo de establecementos viu incrementarse as súas vendas nun 2,4% de media, e un 3,4% a nivel estatal.
En cando á ocupación, na Comunidade baixou un 0,1% en febreiro e ese mesma porcentaxe no que vai de ano, mentres que o comercio polo miúdo español incrementou a súa ocupación un 2,1% en febreiro e un 2% no acumulado de 2024.
DATOS NACIONAIS
A nivel nacional, o comercio polo miúdo rexistrou en febreiro un aumento das súas vendas do 4,8% en relación ao mesmo mes de 2023, ampliando en 2,5 puntos o avance interanual que experimentou en xaneiro, sempre segundo datos do INE. Co repunte de febreiro, o máis pronunciado desde abril de 2022, a facturación do comercio polo miúdo encadea 15 meses consecutivos de incrementos interanuais.
Eliminando os efectos estacionais e de calendario, a facturación do comercio polo miúdo aumentou un 1,9% no segundo mes do ano, taxa 1,4 puntos superior á de xaneiro.
En taxa mensual (febreiro sobre xaneiro) e eliminando o efecto estacional e de calendario, as vendas do comercio polo miúdo subiron un 0,5%, en contraste co descenso do 0,4% experimentado no primeiro mes do ano.
En canto o emprego, o comercio polo miúdo elevou a súa ocupación un 2,1% en febreiro en relación ao mesmo mes de 2023, taxa dúas décimas superior á de xaneiro. Co avance de febreiro, o emprego no comercio polo miúdo encadea 34 meses de incrementos interanuais consecutivos.
