Desautorizada a construción de dous parques eólicos tras a súa declaración de impacto ambiental desfavorable
O complexo eólico de Vaqueira, en Outes, e o de Tramontana (en Baltar, Cualedro e Xinzo de Limia), quedan denegados.
Por Europa Press / Redacción | SANTIAGO DE COMPOSTELA | 25/03/2024 | Actualizada ás 12:50
A Dirección Xeral de Planificación Enerxética e Recursos Naturais da Consellería de Economía, Industria e Innovación publicou este luns no Diario Oficial de Galicia (DOG) o arquivo de dous expedientes para a construción de parques eólicos tras a súa declaración de impacto ambiental desfavorable.
En concreto, a Xunta denegou a solicitude de autorización administrativa previa e de construción das instalacións de parque eólico Vaqueira, que pretendía situarse no concello coruñés de Outes e era promovido por Greenalia Wind Power. Todo iso tras recibir unha declaración de impacto ambiental desfavorable formulada pola Dirección Xeral de Calidade Ambiental, Sustentabilidade e Cambio Climático.
Desta maneira, tamén se cancela a garantía depositada por Greenalia, por importe de 126.000 euros, para garantir o cumprimento das súas obrigacións no procedemento de acceso e conexión á rede de transporte do parque eólico.
Situación similar ocorreu co parque eólico Tramontana, que pretendía instalarse nos municipios ourensáns de Baltar, Cualedro e Xinzo de Limia. Estaba promovido por PE Tramontana, pero tamén obtivo unha declaración de impacto ambiental desfavorable.
Por iso, cancelouse a garantía depositada pola compañía, que ascendía a máis de 1,05 millóns de euros.
Esta situación foi celebrada pola plataforma Stop Eólicos Xurés-Celanova, quen lembrou que foron centos os veciños que se mobilizaron para frear este proxecto, lembrando a existencia de humidais na zona.
