Por Europa Press / Redacción | SANTIAGO DE COMPOSTELA | 24/03/2024 | Actualizada ás 19:10
A Mostra Internacional de Cinema Etnográfico Museo do Pobo Galego outorgou este domingo os premios a mellor película internacional e mellor película en galego a 'Taxibol e 'Habitar', respectivamente.
De 'Taxibol', a película do director italiano Tommaso Santambrogio, o xurado destacou que é unha proposta "impactante e esteticamente portentosa, que explora os límites entre a ficción e a non ficción" e que establece unha contraposición "entre un diálogo íntimo, que transcende as barreiras lingüísticas e culturais, e o retrato sutil de relacións cotiás nas que persisten a violencia, o pasado colonial e as dinámicas de poder".
Mentres, o premio MICE a mellor película galega foi para 'Habitar', unha curta de Anxos Fazáns que o xurado describiu como "creativa e luminosa" que "a través dunha narrativa non convencional, ofrece unha perspectiva lúcida e contribúe á visibilidade das experiencias de persoas transxénero e non binarias".
Tal e como trasladou a organización nunha nota de prensa, a cineasta agredeceu o premio e apuntou o seu desexo dun "audiovisual galego libre e diverso e por seguir construíndo espazos abertos de oportunidades para todas as persoas".
Ademais, o premio Agantro á Excelencia Antropolóxica recaeu en 'El signo vacío', de Kathryn Ramey. O xurado da Asociación Galega de Antropoloxía destacou o "excelente traballo de composición e edición" co que a directora "crea un verdadeiro manual de estilo para o traballo de campo na descrición etnográfica".
Así mesmo, o premio CREA foi para a película 'A Revolución (é) Probable', de María Ruído, Paula Barreiro-López e Le Douglas, e o premio do Público foi para '12 de maio de 1937', de Mar Caldas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.