'Galicia Escena PRO' abre a inscrición de propostas de espectáculos e presentacións

'Galicia Escena PRO', o mercado galego de artes escénicas promovido pola Xunta, que celebrará a súa 11ª edición do 27 a 30 de maio en diferentes espazos de Santiago de Compostela, mantén aberto ata o próximo 14 de marzo o prazo de inscrición de propostas de espectáculos e de presentacións en formato 'pitching' por parte das compañías profesionais galegas cara á selección da programación deste ano. Para esta edición, a feira estrea unha nova colaboración coa mostra Dansa València, que se suma á xa mantida con MADferia de Madrid no marco da súa liña de intercambio con outras comunidades autónomas.

A través do acordo asinado coa Comunitat Valenciana, este encontro incluirá ás artistas galegas Paula Quintas e Marcia Vázquez na programación que se desenvolverá do 13 a 21 de abril na capital valenciana, onde se presentará tamén a nova edición de 'Danza Galicia. Catálogo dixital de danza e artes do movemento', publicación elaborada pola Consellería de Cultura, Educación, FP e Universidades para a difusión da produción coreográfica galega. Á súa vez, Galicia Escena PRO recibirá a unha compañía valenciana, que realizará tamén unha xira por outros escenarios galegos.

Tal e como trasladou a Xunta, manterase igualmente o intercambio de formacións artísticas entre o mercado galego e MADferia Feira de Artes Escénicas de Madrid, na mesma liña común de promover a diversidade cultural, fortalecer os lazos entre comunidades autónomas e propiciar a circulación da creación fóra de cada un destes territorios. Como en anteriores edicións, vólvese a contar coa asociación Escena Galega como coorganizadora do evento, ademais de para o nomeamento da comisión encargada da selección artística, coa finalidade de configurar unha programación "variada, equilibrada e de calidade, na que estean recollidas todas as artes escénicas".

Para a súa exhibición en formato completo, seleccionaranse tanto espectáculos estreados nos meses anteriores como listos para estrear, mentres que as sesións de 'pitching' porán a disposición de cada compañía seleccionada nesta categoría seis minutos para presentar un adianto dos seus proxectos ante os profesionais acreditados.

Na edición de 2023 Galicia Escena Pro superou o medio milleiro de reunións na que participaron máis de 180 profesionais. Entre eles, acudiron á capital galega os responsables de 75 feiras, festivais, circuítos e espazos culturais de Galicia e do resto da península ibérica e dun centenar de compañías galegas e empresas de produción e distribución. Como en anos anteriores, a carteleira de espectáculos abriuse tamén ao público xeral, sumando preto de 2.700 espectadores.

Galicia Escena Pro pecha a súa VII edición tras mostrar 20 espectáculos e propiciar 120 reunións personalizadas | Fonte: XUNTA - Arquivo