Por Europa Press / Redacción | SANTIAGO DE COMPOSTELA | 23/02/2024 | Actualizada ás 18:30
O eurodeputado socialista galego Nicolás González Casares afeou o "antieuropeísmo" do PPdeG e a "irresponsabilidade" da Xunta pola postura do seu conselleiro do Medio Rural en funcións, José González, ante a Política Agraria Común (PAC) da UE no contexto das protestas do sector.
Nun comunicado, o europarlamentario lamentou os "novos ataques" do conselleiro "a Europa", o cal demostra que "non ten nin idea" ou que "minte", posto que "todas as medidas de xestión da produción agraria foron votadas a favor" polo PP en Bruxelas.
González Casares contrapuxo esta postura da Xunta coa do Goberno central, que durante a negociación da PAC "conseguiu 47.700 millóns de euros" de axudas, entre elas "máis de 1.000 millóns para Galicia con cargo ao Plan Estratéxico".
Por iso, reivindicou que o PSdeG-PSOE "defende en Europa o mesmo" que en España e en Galicia, polo que son "o mellor garantizador do futuro do medio rural galego".
No entanto, o eurodeputado socialista tamén cargou contra o BNG, cuxo grupo na Eurocámara (Verdes/Alianza Libre Europea) "votou en contra de todos os regulamentos da reforma da PAC, os mesmos que permiten que esas axudas cheguen aos agricultores e gandeiros do país". "Ao rural hai que defendelo con feitos e non con declaracións", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.