Non dividir ao sector do mar a cambio de "limosnas", é o que piden ás confrarías os convocantes da manifestación do 21X

Os convocantes da manifestación en defensa do mar que tivo lugar en Santiago o 21 de xaneiro fan un chamamento á unidade do sector para reivindicar "entre todos" un plan de actuación que garanta "a curto e longo prazo" o desempeño da actividade mariñeira e marisqueira nas rías galegas.

Representantes dos 115 colectivos e agrupacións de mariscadoras e mariñeiros que convocaron a marcha ofreceron unha rolda de prensa en Carril, en Vilagarcía, para solicitar, principalmente, ás federacións de confrarías "que non caian na trampa" que lle tendeu a Xunta de Galicia para dividir ao sector "a cambio de esmolas".

"Lamentamos profundamente que a Xunta utilizase ás federacións de confrarías para que, por motivos electoralistas, non defendan as medidas que nos levaron a convocar a manifestación de Santiago", sinalou o presidente da Plataforma en Defensa do Mar de Muros-Noia, Rogelio Santos. "Non nos gusta que se utilicen ás federacións para enfrontar a uns mariñeiros contra outros", engade.

Os convocantes da mobilización do día 21 convidaron aos presidentes das federacións de confrarías a que "se poñan ao lado das 20.000 persoas que se manifestaron en Santiago", que, segundo sinalaron, eran maioritariamente mariñeiros e mariscadores. "Lamentamos que a Xunta nos tente comprar con esmolas. Nós somos traballadores. Nós o que queremos é vivir do mar", expuxo Rogelio Santos.

"NON IMOS A INSULTAR AOS NOSOS COMPAÑEIROS"

Rolda de prensa de colectivos convocantes da manifestación en defensa do mar | Fonte: PLADEMAR

Os convocantes rexeitaron as acusacións realizadas polo presidente da Federación Galega de Confrarías, José Antonio Pérez Sieira, quen lles acusou de danar ao sector cunha manifestación "politizada". O presidente de Plademar Muros-Noia replicou que: "O descenso produtivo das rías e o suposto descenso do valor dos nosos produtos non é culpa nosa". "Nós non imos insultar nin faltar ao respecto aos nosos compañeiros. Porque nós non necesitamos descualificar para reafirmar as nosas ideas. Témolas moi claras. E quen descualifica aos seus compañeiros, descualifícase a si mesmo", afirma.

PLAN DE ACTUACIÓN "GOBERNE QUEN GOBERNE"

Ademais de facer un chamamento á unidade e de saír ao paso das acusacións vertidas desde a federación de confrarías, os colectivos promotores da manifestación 'En defensa do noso mar' tamén adiantaron as liñas mestras dun "plan de actuación" que trasladarán ás forzas políticas que se presentan ás eleccións do 18F para que "se sitúen canto antes e dunha forma clara". "As medidas que propomos son para que se apliquen, goberne quen goberne", sinalaron, polo que solicitan aos representantes políticos: "Que digan se van asumir o que estamos a pedir e se o van a pór en práctica".

O plan de actuación, explicaron os seus promotores, ten como obxectivo "responder á situación catastrófica" que sofre o mar en Galicia e "especialmente o marisqueo tradicional". Segundo avanzou o presidente da Plataforma en Defensa da Ría de Arousa, Xaquín Rubido, un dos soportes fundamentais deste plan de actuación é a recuperación ambiental e a rexeneración dos bancos marisqueiros. "Para ese obxectivo necesitamos un plan plurianual ben todo económicamete, polo que entendemos que se deben implicar o tres administracións: Xunta, Estado e Unión Europa", indicou.

EXENCIÓN DE COTAS DA SEGURIDADE SOCIAL

Entre as medidas que contempla este plan de actuación figura a exención das cotas da Seguridade Social para todas as mariscadoras que non poidan ir traballar, mentres dure a súa inactividade. Tamén se solicita á Xunta unha axuda extraordinaria directa, por unha contía equivalente o salario mínimo interprofesional, para todas as mariscadoras, en tanto non poidan exercer a súa actividade.

Estas axudas, engaden, estarían vinculadas ao compromiso por parte das mariscadoras de exercer labores de limpeza e de rexeneración das rías. Outras das demandas que figuran no plan é que se habiliten axudas directas ás confrarías, xa que algunhas están nunha situación crítica. "Se os mariscadores non ingresan, loxicamente, tampouco o fan as confrarías", explicaron.

Entre as solicitudes dos colectivos do mar tamén figura a implantación dun plan de control sanitario das importacións de marisco. "A cota de mercado do marisco galego ausente está a ser ocupada por outro e queremos que teña as mesmas garantías", indican. Os redactores do plan solicitan un incremento da vixilancia do tráfico marítimo que pasa polas costas galegas, así como das verteduras que fan.

"O mar de Galicia non é un vertedoiro para o tráfico internacional", indican. "Da mesma maneira que se multa a un mariñeiro por levar unha nécora en veda, hai que ser duros e contundentes para que nin a industria, nin a minaría, nin o saneamento urbano contaminen e danen as nosas rías", agregan.

O plan tamén inclúe unha solicitude á Xunta para que cambie a normativa dos encoros e outra a Augas de Galicia para que realice un control exhaustivo sobre as verteduras aos ríos e ás rías. Os impulsores do plan de actuación aseguran que as medidas que nel se expoñen: "Non son froito da iniciativa persoal de ningún de nós senón que son froito do consenso entre todos os colectivos asinantes do manifesto 'En defensa do noso mar'.