18F-Pontón marca o obxectivo de aumentar o peso da industria ao 23% do PIB e crear 12.000 empregos
O programa económico presentado por Ana Pontón contempla a revitalización do medio rural coa mobilización de 100.000 hectáreas de terra agraria e un plan de recuperación e rexeneración das rías para recuperar a produtividade do sector mar-industria.
Por Europa Press / Redacción | SANTIAGO DE COMPOSTELA | 25/01/2024 | Actualizada ás 16:25
A portavoz nacional do BNG e candidata á Presidencia da Xunta de Galicia, Ana Pontón, protagonizou este mércores un almorzo-coloquio xunto a representantes do sector empresarial e dos sectores sociais, no que avanzou as liñas estratéxicas e as prioridades do programa económico do Bloque. Márcase como obxectivo de goberno a posta en marcha dun plan de fomento da actividade tecnolóxica e industrial para incrementar ata o 23% o peso deste sector no PIB e xerar ao redor de 12.000 empregos ata o 2030.
A candidata nacionalista destacou a aposta decidida da súa formación pola ciencia, a reindustrialización e un modelo enerxético ao servizo de Galicia, ademais dunha estratexia de captación de investimento privado, a "mobilización produtiva" do aforro galego e a creación dun Instituto Galego de Crédito.
Pontón remarcou a "ambición e confianza" no potencial da comunidade para pór en marcha unha "transformación e modernización económica" para "colocar a Galicia entre as nacións máis avanzadas".
O programa económico do BNG sinala a "reindustrialización" como primeiro proxecto transformador, pechando ciclos produtivos e incrementando as cadeas de valor, cun impulso aos sectores tradicionais como a automoción, o naval, o téxtil, o campo e o mar, pero tamén a outros con potencial de crecemento, como a biotecnoloxía, a cadea monte-madeira, as enerxías renovables ou a bioeconomía circular, entre outros.
Pontón tamén explicou a aposta do programa do BNG pola ciencia e a innovación, coa creación do Innogal para captar financiamento destinado a grandes proxectos que innoven e achegar coñecemento e, por outra banda, co impulso a un pacto pola ciencia xunto a universidades, centros tecnolóxicos e clústeres co obxectivo de destinar o 3% do PIB a este sector no horizonte de 2030, con iniciativa pública e privada.
A candidata nacionalista tamén reiterou a necesidade de crear unha empresa pública de enerxía e a tarifa eléctrica galega fronte ao modelo actual "deseñado a medida do 'lobby' eléctrico". Tamén explicou que, "fronte ao actual espolio dos recursos", no modelo enerxético do BNG a eólica será "compatible co medio ambiente e co rural", e os novos parques estarán "ligados a proxectos industriais para crear emprego, con participación pública e das comunidades locais".
O programa económico presentado por Ana Pontón contempla a revitalización do medio rural coa mobilización de 100.000 hectáreas de terra agraria e un plan de recuperación e rexeneración das rías para recuperar a produtividade do sector mar-industria.
Ademais, comprometeu que se o BNG goberna na Xunta, creará máis chan industrial e apostará pola modernización das infraestruturas, cunha defensa da gratuidade da AP-9, impulso á mobilidade ferroviaria e a alta velocidade entre Vigo-Porto-Lisboa, a coordinación dos aeroportos ou unha estratexia marítima e portuaria como claves para impulsar a competitividade da economía galega.
