A Xunta convoca novas axudas para paliar os danos do lobo en gando autóctono
A esta liña de incentivos, hai que engadir as axudas destinadas á adquisición e instalación de valos fixos e as que teñen como obxecto a compra e mantemento de cans protectores, a adquisición de pastores eléctricos e a colocación de cercas con malla.
Por E.P. | SANTIAGO DE COMPOSTELA | 05/12/2023 | Actualizada ás 18:19
A Xunta de Galicia trasladou o seu apoio ao sector das razas autóctonas en 2024 para afrontar os danos causados polo lobo e avanzou que publicará nas próximas semanas unha nova convocatoria tanto da liña de axudas para prevención de danos como da correspondente a paliar as consecuencias dos ataques desta especie ás explotacións gandeiras da Comunidade.
Así llo comunicou a directora xeral de Patrimonio Natural, Belén do Campo ao director da Federación de Razas Autóctonas de Galicia (Boaga), José Ramón Xusto, e ao presidente da Federación de Razas Autóctonas Españolas (Federapes), José Manuel Lamelas, cos que mantivo unha reunión.
En concreto, no caso da prevención, segundo trasladou a Xunta nunha nota de prensa, a directora xeral fixo fincapé no éxito da primeira convocatoria das axudas para a contratación de persoas coidadoras de gando en explotacións en réxime extensivo para desenvolver tarefas de pastoreo e manexo das reses, que tamén se convocarán en 2024.
A esta liña de incentivos, hai que engadir as axudas destinadas á adquisición e instalación de valos fixos e as que teñen como obxecto a compra e mantemento de cans protectores, a adquisición de pastores eléctricos e a colocación de cercas con malla.
Ademais, do Campo contrapuxo "o esforzo económico" da administración autonómica con "o atraso do Goberno central á hora de levar a cabo a repartición dos fondos asignados para o lobo nos orzamentos de 2023, que xa deberían estar distribuídos e en execución".
Nese sentido, a directora xeral especificou que á Xunta "non lle foron transferidos os fondos do ano 2022, despois de que o Goberno central vinculase o acceso a este financiamiento á subscrición da nova Estratexia nacional do lobo, unha decisión que Galicia non aceptou e pola que segue reclamando por vía xudicial o seu dereito a recibir os 4,3 millóns de euros que lle correspondían segundo a repartición aprobada en Conferencia sectorial".
