O proceso de estabilización por concurso de méritos adxudica 106 prazas fixas de enfermaría
Por Europa Press / Redacción | SANTIAGO DE COMPOSTELA | 15/11/2023 | Actualizada ás 17:41
O sistema de estabilización por concurso de méritos adxudicou, por primeira vez, 106 postos como persoal estatuario fixo na categoría de enfermaría. 55 das prazas corresponden á Área Sanitaria de Santiago e Barbanza e 51, á Área Ourense-Verín-O Barco. En toda Galicia incorporáronse como persoal fixo 459 persoas.
As persoas aspirantes nomeadas, na súa maioría mulleres (92,81 %) dispoñen dun mes para incorporarse ao posto. No caso de non cubrirse algunha destas prazas, conferiraselle ao aspirante seleccionado a continuación. Enfermaría foi a categoría con máis prazas ofertadas, que se suman ás 1.556 do sistema de concurso-oposición, cuxos exames se realizaron o pasado mes de xuño, estando aínda en proceso de iniciarse a fase de concurso.
A xerente da área Sanitaria de Santiago, Eloína Núñez, incide en que con "estas medidas dótase de maior estabilidade ao cadro de persoal dos hospitais da área". Pola súa banda, a directora de enfermaría da área Sanitaria de Santiago e Barbanza, Vitoria Carral García, destacou as melloras "na contratación, fomentando e estabilidade, pero tamén as referidas ás retribucións" do cadro profesional, acordadas o pasado mes de abril cos sindicatos.
PRÓXIMAS PUBLICACIÓNS
Nos próximos días tamén se publicará o nomeamento como persoal estatuario fixo de 42 médicos de familia de atención primaria, o cal seguirá tamén o proceso de concurso de méritos. Ademais, resolverase nos próximos días o concurso de traslados anual. Desta forma, máis de 900 profesionais obterán novos destinos acordes aos seus interedses profesionais ou persoais.
