Cortes de tráfico no túnel de Montefurado por un simulacro de incendio tras o choque de dous coches na noite do martes
Por Europa Press / Redacción | LUGO | 16/10/2023 | Actualizada ás 14:53
O Ministerio de Transportes, Mobilidade e Axenda Urbana (Mitma) levará a cabo, na noite do martes ao mércores, un simulacro de accidente con posible incendio no túnel de Montefurado, na N-120 á altura do municipio lucense de Quiroga, o que afectará o tráfico nesa vía.
Segundo informou o Mitma, despregaranse efectivos de bombeiros, urxencias sanitarias, Garda Civil, Protección Civil, e outros servizos de Emerxencias, así como persoal de xestión do túnel para simular as actuacións e coordinación ante un posible incendio, evacuación de feridos, desvío de tráfico, etc.
Durante a preparación e realización do simulacro (desde as 23.00 horas do martes ata as 3.00 horas do mércores) cortarase o tráfico na N-120 e estableceranse desvíos. A circulación estará cortada en ambos os sentidos da vía entre o quilómetro 476 (Montefurado) e o quilómetro 483 (Bendilló).
No desvío de tráfico, que estará sinalizado, permitirase o paso de todos os vehículos lixeiros e daqueles vehículos pesados que sexan aptos para circular en condicións de seguridade. O resto de vehículos pesados non aptos serán retidos estritamente durante o tempo que dure o simulacro. Para iso, o persoal de conservación encargarase de cribar nos puntos de corte aqueles vehículos non aptos para circular.
O incidente simulado consistirá nunha colisión entre dous vehículos turismos, e un incendio que se simulará mediante a utilización dunha máquina de fumes quentes.
